Tags-Sahil

āḳhirī ḳhvāhish puurī kar ke jiinā kaisā
'ānas' bhī sāhil tak aa ke Duub gayā hai

jis kī qismat meñ ho sāhil pe pahuñchnā us ko
ek tinke kā sahārā bhī bachā saktā hai

ik umr bhaTakte rahe ghar hī nahīñ aayā
sāhil kī tamannā thī nazar hī nahīñ aayā

raat ga.e tak yūñhī tanhā sāhil par
ghūmte rahnā paañv paañv paanī meñ

kashtiyoñ kī aag dafnāne ke ba.ad
dekh le sāhil samundar kā dhuāñ

huā hai ahl-e-sāhil par asar kyā
tujhe ai Dūbne vaale ḳhabar kyā

ham ziist kī maujoñ se kinārā nahīñ karte
sāhil se samundar kā nazāra nahīñ karte

sāhil kī nigāhoñ meñ koī dard hai aisā
maujoñ ko mirī naav Dubone nahīñ detā

sāhil pe kuchh der akele hotā huuñ
phir dariyā se haath milātā rahtā huuñ

dām-e-sāhil hai safīne kī asīrī kā sabab
sar paTaktā huuñ ki ab ye bādbāñ kaise khule

kyā ho sukūñ ai bahr-e-mohabbat
sāhil se hai duur safīna

jab kashtī sābit-o-sālim thī sāhil kī tamannā kis ko thī
ab aisī shikasta kashtī par sāhil kī tamannā kaun kare

Duub jaatā hai jahāñ Dūbnā hotā hai jise
varna pairāk ko dariyā vahī sāhil bhī vahī

tez tūfānoñ ne sāhil rauñd Daale the magar
jab vo Takrā.e pahāḌoñ se ghaTā.eñ de ga.e