Tags-Sahil

na bañdhe tishnagi-e-zauq ke mazmūñ 'ġhālib'
garche dil khol ke dariyā ko bhī sāhil bāñdhā

nā-umīdī ne ba-taqrīb-e-mazāmīn-e-ḳhumār
kūcha-e-mauj ko ḳhamyāza-e-sāhil bāñdhā

lahr ne kise sadā dī duurī ke sāhil se
kashtī vāpas aa.ī dariyā vāpas aayā

ulajh ulajh kar mujhe havādis kī tund lahroñ se khelne do
fasurda sāhil kā ḳhushk māhaul mujh ko bār-e-garāñ rahegā

nāqūs koī bahr kī tah meñ hai na.ara-zan
sāhil kī ye sadā to koī nāḳhudā nahīñ

us meñ jo Duub gayā paar utar jā.egā
mauj-dar-mauj vo dariyā hai to sāhil hai vahī

TuuTā huā ik sāhil-e-rāvī pe makāñ hai
din ko bhī jahāñ shab kī siyāhī kā samāñ hai

baiThnā sāhil pe dariyā kī ravānī dekhnā
aur ḳhālī vaqt meñ filmeñ purānī dekhnā

zanjīr-e-girāñ-bār hai ye ishrat-e-sāhil
bahtā hai to ruktā hī nahīñ vaqt kā dhārā

sabhī kī nazreñ haiñ kashtī ke ruḳh par
magar is bahr kā sāhil nahīñ hai

tah-nashīñ ho kar milī mauj-e-havādis se najāt
kashti-e-umr-e-ravāñ ab dāman-e-sāhil meñ hai

chīḳhtī rahtī haiñ ḳhāmoshī mere hoñToñ par
jis tarah sāhil par lahreñ shor machātī haiñ

hijr ke kaale samundar kā nahīñ sāhil koī
mauja-e-tūfān-e-dahshat se varā kuchh bhī nahīñ

maiñ to har haal meñ Dūbūñgā magar aḳhlāqan
ye zarūrī hai ki sāhil se pukāro mujh ko

milne ko milegā bil-āḳhir ai 'arsh' sukūn-e-sāhil bhī
tūfān-e-havādis se lekin bach jaa.e safīna mushkil hai

havās-o-hosh gum haiñ bahr-e-irfān-e-ilāhī meñ
yahī dariyā hai jis meñ mauj ko sāhil nahīñ miltā

purānī raushnī meñ aur na.ī meñ farq itnā hai
use kashtī nahīñ miltī ise sāhil nahīñ miltā

lab-e-ḳhāmosh sāhil se sukūñ kā dars miltā hai
magar amvāj-e-dariyā kī pareshānī nahīñ jaatī

zarā duur aur hai ai kashti-e-umr-e-ravāñ sāhil
ki is bahr-e-jahāñ meñ har nafas hai bādbāñ merā

paañv dharne ko mayassar aa nahīñ paatī zamīñ
naav ruk jaatī hai aa kar jab lab-e-sāhil mirī