Tags-Sahil

ġharq o ubuur donoñ kā hāsil hai ḳhatm-e-kar
majbūriyoñ ne mauj ko sāhil banā diyā

sāhil pe koī ġhol na us par jhapaT paḌe
DhūñDā hai jo ḳhazīna tah-e-āb bāñdh leñ

sāhil par thī aag hī aag
dariyā meñ tuġhyānī thī

jab tak ki na aa jā.ūñ maiñ sāhil kī nazar meñ
rahne de mujhe gardish-e-taqdīr bhañvar meñ

kahāñ dariyā meñ kashtī Dālnā thī aur kis sāhil utarnā thā
samajh meñ kuchh nahīñ aatā

Takrā.e kabhī mauj se sāhil pe kabhī haiñ
bahte hue dariyā meñ vatan ham ne banāyā

jis ko mājhī samjhā us kī mallāhī
sāhil sāhil merī naav Dubotī hai

muntazir maiñ to ba-har-gām huuñ sāhil kī tarah
sūrat-e-mauj tum aao to koī baat bane

'aijāz' tumhāre liye sāhil pe khaḌā huuñ
dariyā-e-vafā mere liye paar karo nā

sāhil pe laa.ī aur safīne Dubo diye
yuuñ zindagī ne ham ko hañsāyā ki ro diye

thā misālī jo zamāne meñ samundar kā sukūt
kaun tūfān uThātā rahā sāhil ke sivā

samundar aur sāhil pyaas kī zinda alāmat haiñ
unheñ maiñ tishnagī kī had ko bhī chhū kar banātī huuñ

phir ishrat-e-sāhil yaad aa.ī phir shorish-e-tūfāñ bhuul ga.e
nairañgi-e-daurāñ ke maare nairañgi-e-daurāñ bhuul ga.e

naqshe badal chuke haiñ nizām-e-hayāt ke
kashtī-e-zīst tālib-e-sāhil nahīñ rahī

sochtā rahtā hai dil ye sāhil-e-ummīd par
justujū ā.īna-e-madd-o-jazar ho jā.egī

koī nahīñ thā magar sāhil-e-tamannā par
havā-e-shām meñ jab rañg-e-indimāl aayā

mujhe kuchh der meñ phir ye kinārā chhoḌ denā hai
maiñ kashtī huuñ safar merā har ik sāhil se aage hai

bahr-e-ulfat meñ bhī vahshat thī dil-e-ġham-ghīñ ko
rakhtā āġhosh meñ phir dāman-e-sāhil kyūñkar

koī tūfān bas aane hī vaalā hai samundar meñ
ki bū is baat kī ḳhāmoshī-e-sāhil se aatī hai

Thahrā jo zarā bahr-e-mohabbat pe maiñ jā kar
aa.ī lab-e-sāhil se yahī us ke sadā bhaag