Tags-Sahra

phir kisī manzil-e-jāñ-soz kī jānib haiñ ravāñ
chob-e-sahrā kī tarah ahl-e-safar jalte haiñ

ḳhushk ho jā.egī rote hue sahrā kī tarah
kuchh bachā kar bhī to is aañkh meñ aañsū rakkho

sahrā meñ jā ke dekh ki har rūd-e-ḳhushk ko
ham rañg-e-jū-e-shīr banātī hai chāndnī

sahrā meñ kyā dharā hai abhī shahr ko na chhoḌ
kuchh roz dostoñ kī vafā aur dekh le

āvārgī le jaa.e hai jaane kahāñ kahāñ
niklā maiñ sahrā se jūñhī sū-e-jabal gayā

na is shahr-e-be-his ko sahrā kaho
suno ik hamārā bhī ghar hai yahāñ

chhoTā kamra habs balā kā chhoTī aql ke āshiq ham
vahshat karne jaa.eñ kahāñ jab sahrā pīchhe chhūT gayā

aadmī aaj kahīñ jaa.e to kyūñkar jaa.e
sar pe sahrā to zamīñ saarī kī saarī patthar

jo vo ik ḳhush-ḳhayālī thī to ye ik kam-nigāhī hai
na vo phūloñ kā gulshan thā na ye kāñToñ kā sahrā hai

saaya na koī naqsh-e-qadam kūcha na bāzār
sahrā ke safar meñ thā bhaTaktā bhī to kaise

ḳhushk āñkhoñ se uThī mauj to duniyā Duubī
ham jise samjhe the sahrā vo samundar niklā

sahrā agar nahīñ hai to sahrā se kam nahīñ
ai rabb-e-qais qalb kī vahshat qubūl kar

kaisī hai ajab raat ye kaisā hai ajab shor
sahrā hī nahīñ ghar bhī machātā hai ajab shor

be tere kyā vahshat ham ko tujh bin kaisā sabr o sukūñ
tū hī apnā shahr hai jaanī tū hī apnā sahrā hai

dīvāne hue sahrā meñ phire ye haal tumhāre ġham ne kiyā
afsos magar is baat kā hai kyā tum ne kiyā kyā ham ne kiyā

parvardigār tū ne samundar to de diye
ab mere ḳhushk hoñToñ ko sahrā kī pyaas de

samā saktā nahīñ pahnā-e-fitrat meñ mirā saudā
ġhalat thā ai junūñ shāyad tirā andāza-e-sahrā

duur sahrā meñ koī zulf sī lahrā.ī hai
koī bādal sā uḌā hai mujhe tar karne ko

abhī se soch lo ḳhāna-badosho
hamārī raah meñ sahrā paḌegā