Tags-Sahra

baaġh meñ lagtā nahīñ sahrā se ghabrātā hai dil
ab kahāñ le jā ke baiTheñ aise dīvāne ko ham

shamīm-e-gulshan nasīm-e-sahrā shuā-e-ḳhurshīd mauj-e-dariyā
har ek garm-e-safar hai in meñ merā koī ham-safar nahīñ hai

chaliye kahīñ sahrā hī meñ ab ḳhaak uḌā.eñ
bastī meñ to sab jal ga.iiñ ḳhvāboñ kī ridā.eñ

atā-e-abr se inkār karnā chāhiye thā
maiñ sahrā thī mujhe iqrār karnā chāhiye thā

ye kah kar ābla-pā rauñdte jaate haiñ kāñToñ ko
jise talvoñ meñ kar leñ jazb use sahrā samajhte haiñ

kahīñ hoñ tere dīvāne Thahar jaa.eñ to zindāñ hai
jidhar ko muñh uThā kar chal paḌe sahrā samajhte haiñ

ḳhushī se phūleñ na ahl-e-sahrā abhī kahāñ se bahār aa.ī
abhī to pahuñchā hai ābloñ tak mirā mazāq-e-barhana-pā.ī

dekho jo ġhaur se kabhī chehroñ kī vahshateñ
ābādiyoñ meñ bhī tumheñ sahrā dikhā.ī de

vahshat se thā navāznā itnā agar mujhe
sahrā diyā hai kyuuñ faqat āfāq bhar mujhe

mauj-e-dariyā ko piyeñ kyā ġham-e-ḳhamyāza kareñ
rag-e-afshurda-e-sahrā meñ lahū taaza kareñ

reg-zāroñ meñ chalā qāfila-e-mauj-e-hayāt
tishnagī ret ke sahrā meñ samundar badle

bādal dekh ke chal dete haiñ
sahrā pyāsā rah jaatā hai

kisī ko sahrā-navardī se ishq lāhaq thā
kisī ko shauq ne ghar se nikāl rakkhā thā

koh-o-sahrā-o-gulistāñ meñ phirā kartā hai
mutalāshī vo tirā āb-e-ravāñ hai ki jo thā

apnī miTTī se rahī aisī rifāqat mujh ko
phailtā jaatā hai ik ret kā sahrā mujh meñ

mere paas aa ke koī tishna-labī bhuul gayā
maiñ to samjhā thā ki taptā huā sahrā huuñ maiñ

sahrā kar diyā jis ne dil ko
sāvan kī ye vahī jhaḌī hai

tirī fitrat meñ yuuñ musbat ishāre DhūñDtā huuñ maiñ
kisī sahrā ko jaise chāhtā huuñ aabjū karnā

terā merā saath hai yuuñ
juuñ sahrā se aab judā

raat damaktī hai rah rah kar maddham sī
khule hue sahrā ke haath pe nīlam sī