Tags-Sahra

pyaas ko dariyā rahā aur ḳhaak ko sahrā rahā
is ke ma.anī ye hue ke ye safar achchhā rahā

dil Thikāne ho to sab kuchh hai aziiz
jī bahal jaatā hai sahrā kyuuñ na ho

dhuup pī kar tamām sahrā kī
abr ban kar maiñ ḳhud pe chhā jā.ūñ

ārif-e-kāmil haiñ in sahrāoñ ke sahrā-navard
yaañ to har majnūñ kā andāz-o-adā kuchh aur he

bahut nādān lagtā hai musāfir
use sahrā se dariyā māñgne do

ab uḌātā hai mirī sahrā-navardī kā mazāq
ishq karne ke liye thā jis ne uksāyā mujhe

bahār aa.e to merā salām kah denā
mujhe to aaj talab kar liyā hai sahrā ne

tamāshā-gāh-e-hairat hai dayār-e-dil kī vīrānī
ye sannāTā miyān-e-dasht-o-sahrā ho nahīñ saktā

maiñ jāntā huuñ ye dariyā nahīñ hai sahrā hai
to ret par hī chalo machhliyāñ banāte haiñ

ḳhāk-e-sahrā pe jame yā kaf-e-qātil pe jame
farq-e-insāf pe yā pā-e-salāsil pe jame

ham nahīñ ab bārishoñ ke muntazir
ab hameñ sahrā kī aadat ho ga.ī

kashtī jab ho beach safar meñ ishq samundar sahrā kyā
manzil kī jānib ab dekho chhoḌo bhī tūfānoñ ko

ham ne sahrā ko sajāyā thā gulistāñ kī tarah
tum ne gulshan ko banāyā hai bayābāñ kī tarah

DhūñDhtā phirtā huuñ ab tak bhī haiñ sahrā sahrā
usī lamhe ko jo thā fasl-e-bahārāñ kī tarah

har jagah haiñ chāhne vaale tire
koī sahrā meñ koī gulzār meñ

lahlahātī vādiyoñ se ḳhūb-tar haiñ reg-zār
dil ke sahrā meñ gulistāñ kī fazā paidā karo

sahrā meñ jo milā thā mujhe itnā yaad hai
merā hī naqsh-e-pā thā mujhe itnā yaad hai

ye ajab havas kā dayār hai yahāñ aam anā kā ḳhumār hai
mujhe apne sahrā se pyaar hai mujhe raas dar-ba-darī rahī

phir dil ne kahā hañs ke vo sahrā ho qafas ho
jab us se bichhaḌnā hai to tanhā.ī bhī kyā hai

aap kahiye to chalūñ dasht kī sahrā kī taraf
aur agar kahiye to dariyā ko ravāna ho jā.ūñ