Tags-Sahra

maujeñ ki bagūle hoñ mire dil kā har ik rañg
sahrā hai judā aur samundar se alag hai

kaT gayā din kā dahaktā huā sahrā bhī to kyā
raat ke gahre samundar meñ utarnā hai abhī

sar-e-sahrā sadā dil ke shajar se
barastā duur ik bādal rahā hai

dariyā hai rukā huā hamārā
sahrā meñ ret bah rahī hai

kab se huuñ zindagī ke sahrā meñ
chhāñv ab to mile ghanī koī

ai ḳhudā ret ke sahrā ko samundar kar de
yā chhalaktī huī āñkhoñ ko bhī patthar kar de

kabhī hai mānind-e-mauj-e-dariyā kabhī hai misl-e-ġhubār-e-sahrā
kahūñ maiñ kyā haal apne dil kā bichhaḌ ke mujh se ravāñ-davāñ hai

bahut se shahr rahne ke liye hāzir the lekin
hamesha zinda rahne ke liye sahrā chunā thā

mujhe bulāne makāñ aa na jaa.e sahrā tak
maiñ ghar se aayā to huuñ naqsh-e-pā miTātā huā

dariyāoñ meñ ret uḌegī sahrā kī
sahrā se girdāb guzarne vaalā hai

bikherte raho sahrā meñ biij ulfat ke
ki biij hī to ubhar kar shajar banāte haiñ

sahrā meñ bhī gā.ūñ kā dariyā saath rahā
dekho mere paaoñ abhī tak giile haiñ

vo jo ik shart thī vahshat kī uThā dī ga.ī kyā
merī bastī kisī sahrā meñ basā dī ga.ī kyā

tirī āvāz mire vāste sahrā kā sukūt
merī ḳhāmoshī rah-o-rasm-e-duā Thahregī

had-e-nazar tak ik tanhā.ī ḳhaak uḌātī phirtī hai
sahrā be-bas apnī hī vīrānī se ho jaatā hai

sadā bhī degā kabhī to sukūt kā sahrā
kisī ko hone to do ḳhud se ham-kalām abhī

garebāñ chaak kar rote kahāñ ham
agar ye dāman-e-sahrā na hotā

patthar kī qabā pahne milā jo bhī milā hai
har shaḳhs yahāñ soch ke sahrā meñ khaḌā hai

ḳhushk-lab lauTe haiñ kyuuñ sahrā-navard
rāste meñ kyā sarāb aayā nahīñ

maiñ ne to faqat ret pe ik naam likhā thā
sahrā kī havāoñ meñ hai gulzār kī ḳhushbū