Tags-Sahra

kahānī jab bhī dohrā.ī pas-e-har-ābla-pā.ī
vahī mahmil vahī majnūñ vahī sahrā nikal aayā

dastaras meñ hai jahān-e-sahrā
ahl-e-dil ahl-e-mohabbat haiñ ham

jism kyā thā lazzatoñ kā ek dariyā thā kabhī
har kisī ne pī ke jis ko aaj sahrā kar diyā

lazzat-e-sañg na pūchho logo umr agar haath aa.e phir
majnūñ ban kar sahrā sahrā koī use gañvā.e phir

na maiñ zindānī-e-sahrā na asīr-e-gulshan
koī bandish ho use jī kā ziyāñ kahtā huuñ

dil-o-dīda par kyā ijāra hamārā
na sahrā hamārā na dariyā hamārā

ḳhāk-e-sahrā pe lakīreñ haiñ unheñ phir dekho
kahīñ ye ḳhat na hoñ likkhe hue dīvānoñ ke

tirī hī aas meñ guzre haiñ dhuup chhāñv se ham
tirī hī pyaas meñ sahrā bhī ḳhush-gavār huā

har sub.h-o-shām baaġh meñ sahrā meñ juuñ nasīm
us gul kī justujū kī havas par ḳharāb huuñ

ham ahl-e-shauq ko sahrā kī vus.atoñ meñ 'atā'
asiir karne ko dīvār-o-dar chale aa.e

mirī āñkhoñ meñ sāhil tak namī hai
magar nazreñ ki sahrā chhāntī haiñ

har ek samt yahāñ vahshatoñ kā maskan hai
junūñ ke vāste sahrā o āshiyāna kyā

use pyaas sahrā kī bhātī nahīñ hai
vo 'fārūq' dariyā pe bārish kare hai

ḳhvāb sahrā tirī ta.abīr nikal aa.ī hai
koī vahshat hai ki jāgīr nikal aa.ī hai

baiThā huuñ apnī zaat kā naqsha nikāl ke
ik be-zamīn haarī huuñ sahrā nikāl ke

gale se lag ke mire pūchhne lagā dariyā
kyuuñ apnī pyaas ko sahrā meñ chhoḌ kar aayā

zarf vīrāna ba-qadr-e-himmat-e-vehshat nahīñ
laao har zarre meñ paidā vus.at-e-sahrā kareñ

lagā ke dhaḌkan meñ aag merī ba-rañg-e-raqs-e-sharar gayā vo
mujhe banā ke sulagtā sahrā mire jahāñ se guzar gayā vo

sar-e-sahrā abhī raqs-e-ġhubār-e-qais baaqī hai
abhī kuchh aur lailā.eñ harīm-e-ḳhāk se nikleñ

kohsār pe chal ke roiye ab
sahrā to bahut Dubo chuke ham