Tags-Sahra

ye na sochā thā kaḌī dhuup se rishta bhī to hai
sirf dariyā hī nahīñ raah meñ sahrā bhī to hai

sahrā kī tapish pyaas kī shiddat thī ki us ne
bhūlā huā ik qissa-e-namnāk nikālā

sahrā kī tez dhuup mujhe aa ga.ī hai raas
jañgal kī sard raat koī mas.ala nahīñ

mahram-e-dil huā vo sahrā vā
kar ki ma.alūm vālī-o-rusvā

āñgan hī meñ ab dil ke ham ḳhaak uḌāte haiñ
ghar hī meñ nikal aa.ī gunjā.ish-e-sahrā bhī

shahroñ meñ aa ke kaise āhista-rau huā maiñ
sahrā meñ tez apnī raftār lag rahī thī

shahar-o-sahrā kī kuchh nahīñ taḳhsīs
vus.at-e-dasht-e-jāñ se tañg huuñ maiñ

yā abr-e-karam ban ke baras ḳhushk zamīñ par
yā pyaas ke sahrā meñ mujhe jiinā sikhā de

sahrā se bāhar niklūñ to
har rasta ghar kā rasta hai

aise sahrā se na rishta ban jaa.e
ek bārish meñ jo dariyā ban jaa.e

shanāḳht miT ga.ī chehre pe gard itnī thī
hamārī zindagī sahrā-navard itnī thī

hadd-e-fāsil to faqat dard kā sahrā niklī
chashm-e-afsurdagī-e-ḳhushk hī dariyā niklī

ruuTh kar baiTh ga.ī himmat-e-dushvār-pasand
raah meñ ab koī jaltā huā sahrā bhī nahīñ

nahīñ mumkin ki sahrā ko bhulā duuñ lutf-e-manzil meñ
mire paañv ke talve meñ chubhī hai nok-e-ḳhār ab tak

vo ārzūoñ kā mausam to kab kā biit chukā
maiñ kab se jhel rahā huuñ dukhoñ ke sahrā ko

sahrā sulag rahā ho to paanī bujhā.egā
paanī kī aag ko jo kare sard kaun hai

ab TuuT ke sahrā meñ bikharne kī havas hai
ik gosha-e-dāman pe qanā.at nahīñ ab ke

use batānā ki apne dariyāoñ kī hifāzat ke kaam aa.e
vo peḌ kashtī bane hue haiñ jinhoñ ne sahrā meñ nam rakhā thā

sahrā meñ bhaTaktā huā ik dariyā huuñ
aayā na taḌapnā jise vo paara huuñ

ābādiyoñ ko chhoḌ ke ḳhush ho gayā thā maiñ
sahrā bhī tañg hai mirī vahshat ke sāmne