Tags-Sahra

aao dekheñ ye hijr kā sahrā
aur kartā hai dar-ba-dar kab tak

maiñ abhī ik buuñd huuñ pahle karo dariyā mujhe
phir agar chāho karo vābasta-e-sahrā mujhe

is kī kyā ta.abīr karūñ maiñ kuchh tū hī samjhā 'manzūr'
maiñ ne ḳhvāb meñ dekhā sahrā meñ ik dariyā bikhrā hai

vo to majnūñ thā rahā jo umar bhar sahrā-navard
ham jahāñ pahuñche vahīñ sahrā uThā kar le ga.e

dhuup kā sahrā nazar aatā hai ab chāroñ taraf
aap to har peḌ kā saayā uThā kar le ga.e

phuul haiñ sahrā meñ yā pariyāñ qatār andar qatār
uude uude niile niile piile piile pairahan

reg-e-sahrā kā ajab rañg havāoñ ne kiyā
naqsh sā khiñch gayā dariyā kī ravānī kī tarah

sahrā meñ base sab dīvāne shahroñ meñ bhī mahshar hai barpā
allāh tirī is ḳhilqat se baaqī na rahā vīrāna tak

ābloñ se nigār-e-sahrā hai
rishta-e-ġham payāmbar se hai

merī sahrā-zād mohabbat abr-e-siyah ko DhūñDhtī hai
ek janam kī pyāsī thī ik buuñd se tāza-dam na huī

dasht-o-sahrā ujaaḌ aayā huuñ
DhūñDhtā huuñ kahāñ hai ghar merā

vo aañkh jo sahrā kī tarah hai yak-o-tanhā
is raah meñ rakh do koī barsāt kisī din

niklegī bū-e-zulf hamārī talāsh meñ
sahrā meñ ab havā-e-gulistāñ bhī aa.egī

zindagī thī ek sahrā kī tarah
zindagī ko kar gayā jal-thal koī

maiñ jin ko saa.e meñ rakhtā thā tapte sahrā meñ
ġhazab hai log vahī mujh pe sañg maar ga.e

kyuuñ ye dayār mere liye tañg sā lagā
kyā baat hai ki dāman-e-sahrā simaT ga.e

sahrā meñ phirātī hai mujhe ḳhāna-ḳharābī
ye DhūñD rahā huuñ ki mirā ghar bhī yahīñ hai

vahī sahrā hai vahī ranj-e-safar
vahī qissa hai abhī tak merā

hai zarra zarra bhī sahrā hai qatra qatra bhī dariyā
samjho na to aiman hai patthar patthar ko jo samjho tuur bhī hai

nishān-e-manzil-e-maqsūd jo āġhāz meñ paayā
vahī sahrā-ba-sahrā thā vahī manzil-ba-manzil thā