Tags-Sahra

ḳhvāb muTThī meñ liye phirte haiñ sahrā sahrā
ham vahī log haiñ jo dhuup ke par kāTte haiñ

tire bāzuoñ kā sahārā to le luuñ magar in meñ bhī rach ga.ī hai thakan
maiñ sahrā se bach kar chaman meñ to aa.uuñ pa sahrā se kuchh kam nahīñ ye chaman

dhuup ke sahrā meñ chal kar dekhnā
ābloñ kī shādmānī aur hai

samo ke āñkhoñ meñ umDī ghaTā.eñ ai 'āzād'
vo ek dard kā sahrā banā gayā mujh ko

aañkh pe paTTī bāñdh ke mujh ko tanhā chhoḌ diyā hai
ye kis ne sahrā meñ lā kar sahrā chhoḌ diyā hai

ik ajnabī jhoñke ne jab pūchhā mire ġham kā sabab
sahrā kī bhīgī ret par maiñ ne likhā āvārgī

bhaTakte haiñ gulistāñ meñ bayābānoñ meñ sahrā meñ
misāl-e-qais dīvāne sitāro tum to so jaao

āsmāñ ek sulagtā huā sahrā hai jahāñ
DhūñDhtā phirtā hai ḳhud apnā hī saayā sūraj

kārvāñ se jo bhī bichhḌā gard-e-sahrā ho gayā
TuuT kar patte kab apnī shāḳh par vāpas hue

har phuul kī mahak hai chaman meñ junūñ-asar
shāyad isī jagah koī sahrā bhī thā kabhī

ḳhushk sahrā meñ kahāñ hai paanī
dafn jañgal meñ anā kī jaa.e

naġhma-zan sahrā meñ ho jis tarah koī andalīb
yuuñ hai ai 'mahrūm' sarhad meñ ġhazal-ḳhvānī mirī

kam na thī sahrā se kuchh bhī ḳhāna-vīrānī mirī
maiñ nikal aayā kahāñ ai vaa.e nādānī mirī

tire ruḳh kā kise saudā nahīñ hai
gul-e-lāla talak sahrā-nashīñ hai

tirī yādoñ kī rut aa.ī huī thī
ye sahrā mor kā par lag rahā thā

maiñ tire hijr kī giraft meñ huuñ
ek sahrā hai mubtalā mujh meñ

hamāre beach sarāboñ kā ek rishta thā
kahāñ bichhaḌ ga.e sahrā meñ ham nazar mere

talvoñ meñ narm ghaas bhī chubhne lagī 'nasīm'
sahrā kuchh is tarah mire pairoñ meñ bas gayā

ik dhuup zindagī ko yuuñ sahrā banā ga.ī
aa.e na is ujaaḌ meñ mausam bahār ke

bādiya-paimā.ī-e-vahshat se tañg
be-ufaqī vus.at-e-sahrā kī hai