Tags-Sahra

na ho jo shahar kī mānind būd-o-bāsh nahīñ
yahī bahut hai ki sahrā meñ ham amaan se haiñ

sahrā-pasand ho ke simaTne lagā huuñ maiñ
andar se lag rahā hai ki baTne lagā huuñ maiñ

muntazir aur bhī sahrā haiñ isī bādal ke
sirf tujh par hī bhalā kaise ye har pal barse

maiñ jab niklā tamannā ke safar par
mire raste meñ ik sahrā paḌā thā

kārvāñ se jo bhī bichhḌā gard-e-sahrā ho gayā
TuuT kar patte kab apnī shāḳh par vāpas hue

maiñ sahrā meñ tasallī se rahūñgā
musalsal tishnagī hī tishnagī hai

sahrā meñ phir rahe the sulaimāñ bane hue
jis ko junūn kahte haiñ saaya parī kā thā

tū sāhab-e-qudrat hai tū apnā karam rakhnā
sahrā kī taraf maa.il hālāt kī kashtī hai

ḳhār-e-sahrā par kisī ne tohmat-e-duzdī na kī
paañv kā majnūñ ke kyā kyā aabla jaatā rahā

bujhā bujhā sā hai qalb-e-sahrā bujhī bujhī sī hai reg-e-tābāñ
fareb khā.egī tishnagī kyā sarāb bhī bujh ke rah ga.e haiñ

chob-e-ḳhushk sahrā huuñ aur aarzū gul kī
sādgī se baḌh kar bhī hai koī himāqat kyā

bastī bastī ghor añdherā yā añgāre barseñ
sahrā sahrā narm ujāle jaisī terī marzī

ik sahrā meñ rone vaale pahle TuuT ke rote haiñ
aur duā.eñ bo aate haiñ phir us giilī miTTī meñ

hameñ ranjish nahīñ dariyā se koī
salāmat gar rahe sahrā hamārā

farz hai dariyā-diloñ par ḳhāksāroñ kī madad
farsh sahrā ke liye lāzim huā sailāb kā

vaqt ke sahrā meñ nañge paañv Thahre ho 'salīm'
dhuup kī shiddat yakāyak baḌh na jaa.e chal paḌo

sahrā kī chhāntā hai vo ḳhaak ḳhaak zarra
ik ajnabī sā ġham hai rusvā.ī chāhtā hai

din ke sahrā meñ jise DhūñD na paa.eñ 'fikrī'
shab ke jañgal meñ vo āvāz sunā karte haiñ

is bayābān-e-dar-o-bām meñ kyā rakkhā hai
ham hī dīvāne haiñ sahrā se chale aa.e haiñ

yahāñ pe rahtā nahīñ koī qais naam kā shaḳhs
kisī ne aap ko sahrā ġhalat batāyā hai