Tags-Sahra

sahrā meñ bagūlā bhī hai 'majrūh' sabā bhī
ham sā koī āvāra-e-ālam to nahīñ hai

ai dil tire ḳhayāl kī duniyā kahāñ se laa.eñ
in vahshatoñ ke vāste sahrā kahāñ se laa.eñ

ye tez-gāmi-e-sahrā alag mizāj kī hai
jo mujh se bhaag rahī hai qarīb aate hue

tum se bichhaḌ ke ham ne dil ko bahut sambhālā
gulshan meñ ye na bahlā sahrā meñ bhī satā.e

mere ḳhvāboñ ne dil ke sahrā meñ
aaj ik qabr-gāh le lī hai

haa.e ye taaza havā gulshan meñ kaisī chal paḌī
bulbul-e-bāġh-o-bahārāñ rū-ba-sahrā ho gayā

maiñ thī dīvār to ab kis kā hai saaya tujh par
aisā sahrā-zada chehrā na thā pahle pahle

ab jo āñkheñ huiiñ sahrā to khulā har manzar
dil bhī vahshat ko tarastā rahā pahle pahle

jo ziist ke tapte sahrā par bhūle se kabhī barsā bhī nahīñ
har moḌ pe har ik manzil par phir kyuuñ vahī bādal yaad aayā

jo pyāse haiñ 'bāno' tum un ko sadā do
ki sahrā meñ utrā hai chashmoñ kā mausam

'sāhir' ye merā dīda-e-giryāñ hai aur maiñ
sahrā meñ koī dūsrā jharnā to hai nahīñ

ba-zāhir ek sahrā haiñ magar aisā nahīñ hai
hamārī ḳhaak ko kitne hī dariyā ro ga.e haiñ

ham vo sahrā ke musāfir haiñ abhī tak jin kī
pyaas bujhtī hai sarāboñ kī kahānī sun kar

mujhe to karnī paḌī ābyārī-e-sahrā
magar nasīb meñ thī tishnagī samundar kī

dahan-e-gurg se jiitā jo bachūñ sahrā meñ
zab.h karne ke liye mol le qassāb mujhe

phuul patte jab chaman se dar-ba-dar hone lage
pur sakūñ sarsabz duniyā ban ke sahrā rah ga.ī

imtihāñ thā maslahat thī yā mirī taqdīr thī
maiñ gulistānoñ kā tālib thā mujhe sahrā mile

vo vus.ateñ thiiñ dil meñ jo chāhā banā liyā
sahrā banā liyā kabhī dariyā banā liyā

apne manzar se judā thā ik din
paanī sahrā meñ khaḌā thā ik din

paañv pakaḌ kar kahtī hai zanjīr-e-zindāñ meñ raho
vahshat-e-dil kā hai iimā rāh-e-sahrā lījiye