Tags-Sahra

khul nahīñ paayā mirī ruuh pe sahrā 'sājid'
ya.anī mahdūd huuñ maiñ sair-o-safar tak ab bhī

sahrā o shahr sab se āzād ho rahā huuñ
apne kahe kināre ābād ho rahā huuñ

phuul khilne lage the sahrā meñ
sāmne phir sarāb aa.e the

kaun detā rahā sahrā meñ sadā merī tarah
aaj tanhā huuñ magar koī to thā merī tarah

sahrā meñ huī guhar-fishānī
kaam aa.ī mirī barahna-pā.ī

kab tak us kā hijr manātā sahrā chhoḌ diyā
jiine kī ummīd meñ maiñ ne kyā kyā chhoḌ diyā

chhoḌ aanā vahīñ par zarā āvāra-mizājī
sahrā kī taraf ai dil-e-nādān agar jā

ki yuuñ manzar badal jaane se hairānī nahīñ hotī
agar gulshan meñ rahnā ho to sahrā dekhte rahiye

rahīn-e-dasht huuñ sahrā kā rāz-dāñ huuñ maiñ
rumūz-e-dasht bayābāñ kī boliyāñ le lo

maiñ ġham kā sahrā ubuur karne ke ba.ad ḳhud se bichhaḌ gayā huuñ
ajiib rāh-e-najāt niklī ajiib rāh-e-farār dekhī

mahmil bhī nahīñ koī nazar meñ
sahrā kī bhī ḳhaak chhāntā huuñ

na bagūle haiñ na kāñTe haiñ na dīvāne haiñ
ab to sahrā kā faqat naam hai sahrā kyā hai

majnūñ aur shāhoñ meñ kuchh din maiñ bhī uTThā baiThā huuñ
sahrā ko gulzār samajhne vaale mujh se duur raheñ

apnī hī zaat ke sahrā meñ sulagte hue log
apnī parchhā.īñ se Takrā.e hayyūloñ se mile

chilchilātī dhuup ġham kī hādsoñ ke sā.ebāñ
soch kā taptā ye sahrā aur ye purvā.ī ki bas

kaun haiñ vo jinheñ āfāq kī vus.at kam hai
ye samundar na ye dariyā na ye sahrā merā

zavāl-e-jism ko dekho to kuchh ehsās ho is kā
bikhartā zarra zarra koī sahrā kaisā lagtā hai

is se achchhe dash-e-sahrā is se achchhe gard-bād
ālam-e-vahshat meñ merā ghar koī ghar rah gayā

thakā thakā sā tasalsul banā ke dariyā kā
ye phailtā huā sahrā na ab banā mujh ko

koh o sahrā bhī kar na jaa.e baash
aaj tak koī bhī rahā hai yaañ