Tags-Samundar

ek manzar iztirābī ek manzar se ziyāda
dil hai sāhil dil safīna dil samundar se ziyāda

tumhārī aañkh kī gahrā.iyoñ kā kyā taqābul ho
nadī se jhiil se dariyā se jharne se samundar se

hamārī aañkh meñ jaadū bharā samundar hai
ham us kā aks nazar se nithār sakte haiñ

bheḌeñ ujlī jhaag ke jaisī sabza ek samundar sā
duur khaḌā vo parbat niilā ḳhvāb meñ khoyā lagtā hai

mirī āñkhoñ ko āñkhoñ kā kināra kaun degā
samundar ko samundar meñ sahārā kaun degā

kaisā laavā hai tah-e-āb yahāñ āñkhoñ meñ
kaun aaya hai samundar ko jazīra karne

hazīmatoñ ke safar kā raahī ufuq ko dekhegā bebasī se
ufuq se baḌhtā huā samundar zamīñ ko qadmoñ se khīñch legā

siyah-rāt meñ TimTimāte sitāroñ ke nīche
ḳharoshāñ samundar kī maujeñ tujhe DhūñDhtī haiñ

havā.eñ shauq samundar kī mehrbāñ ho jaa.eñ
talab safīna ho armān bādbāñ ho jaa.eñ

samundar se kisī din phir mileñge
abhī pīnā-pilānā chal rahā hai

samundar se kisī lamhe bhī tuġhyānī nahīñ jaatī
magar sāhil ko ġham hai ḳhushk-dāmānī nahīñ jaatī

samundar meñ vahī tūfān hai phir
ki dariyā apnā hissa māñgtā hai

ek qatra huuñ magar sail-e-mohabbat se tire
ho sake jo na samundar se bhī kar jā.ūñgā

ai fanā TuuT sakegī na kabhī kashti-e-umr
maiñ kisī aur samundar meñ utar jā.ūñgā

vaqt ke zālim samundar meñ pareshānī ke saath
Duub jaatā hai koī kyuuñ itnī āsānī ke saath

sabhī ko ġham hai samundar ke ḳhushk hone kā
ki khel ḳhatm huā kashtiyāñ Dubone kā

samundar se koī itnā to pūchhe
nadī kyuuñ suukh jaanā chāhtī hai

din ko the ham ik tasavvur raat ko ik ḳhvāb the
ham samundar ho ke bhī is ke liye pāyāb the

kabhī to vaqt kī sarhad ke paar utrūñgā
ki buuñd buuñd samundar ko pī rahā huuñ maiñ

ajiib sā mire siine meñ ik talātum hai
ki mauj mauj samundar banā huā huuñ maiñ