Tags-Samundar

vo tez lahar to hāthoñ se le ga.ī kashtī
phir us ke ba.ad samundar khañgālte guzrī

rasā.ī jis kī na thī be-karāñ samundar tak
vo mauj-e-nahr bhī chhīñTe uchhālte guzrī

ye aañsū kis liye ruktā nahīñ hai
samundar to kahīñ pyāsā nahīñ hai

mujh ko motiyoñ se kyā lenā 'zeb' samundar bhī
jaane kyā mire ashkoñ kī sauġhāteñ kartā hai

jaag ke mere saath samundar rāteñ kartā hai
jab sab log chale jaa.eñ to bāteñ kartā hai

tamām dariyā jo ek samundar meñ gir rahe haiñ to kyā ajab hai
vo ek dariyā jo rāste meñ hī rah gayā hai vo shā.irī hai

chuum lete haiñ kināroñ kī hadeñ
jhuum uThte haiñ samundar raat meñ

ghaḌī-bhar us kī āñkhoñ meñ utar kar
samundar bhī kushāda ho gayā hai

chashm-e-hairat saare manzar ek jaise ho ga.e
dekh le sahrā samundar ek jaise ho ga.e

be-yaqīnī hī be-yaqīnī hai
har samundar sarāb jaisā hai

ḳhud ko pahchān ke dekhe to zarā ye dariyā
bhuul jā.egā samundar kī taraf jaanā bhī

ye alag baat samundar pe vo barsī 'sājid'
aur kisī khet ko pyāsā na ghaTā ne rakkhā

pāniyoñ par jhilmilātī chāñdnī jaisā
mire dil kā samundar jab bhañvar kī zad meñ aa jaa.e

hamāre ghar kā ajīb-o-ġharīb manzar hai
kahīñ to aag lagī hai kahīñ samundar hai

samundar phir hilore legā tahzīb-o-tamaddun kā
zarā dekho to 'ājiz' shāmil-e-urdu-zabāñ kar ke

ek samundar ek kināra ek sitārā kaafī hai
is manzar meñ us ke alāva koī akelā kaafī hai

utrā nahīñ nafrat ke samundar meñ kabhī maiñ
mujh meñ kabhī nafrat kā samundar nahīñ utrā

bujhā do
lahū ke samundar ke us paar

apnī nākām umīdoñ ke ḳham-o-pech meñ gum
abr-e-kam-āb the ham rizq-e-samundar na hue

ḳhatm hotī hai samundar pe kabhī sahrā meñ
rāste chuntī hai dariyā kī ravānī kyā kyā