Tags-Samundar

maiñ vo qatra ki jis meñ samundar kī betābiyāñ maujzan haiñ
vo lamha jo mustaqbil-o-hāl-o-māzī kā aa.ina hai

maiñ chaudhvīñ kā chāñd samundar tirā badan
merī kashish kā boltā jaadū bhī dekh le

kahāñ qatre kī ġham-ḳhvārī kare hai
samundar hai adākārī kare hai

qurbatoñ ke ghaaT par sūkhī nadī sābit huā
fāsloñ ke dasht meñ gahrā samundar thā koī

maiñ vo dariyā huuñ jo ghar se kabhī niklā hī nahīñ
pyaas le kar merī chaukhaT pe samundar aa.e

ho uThā phir se siyāsat meñ samundar manthan
zahr piine ke liye phir koī shañkar aa.e

jo mushkil rāste haiñ un ko yuuñ hamvār karnā hai
hameñ jazboñ kī kashtī se samundar paar karnā hai

hairān hai kis kā jo samundar
muddat se rukā huā khaḌā hai

kyā bharosa hai samundar kā ḳhudā ḳhair kare
sīpiyāñ chunñe ga.e haiñ mire saare bachche

haiñ chaah meñ iqrā kī is ilm-e-do-ālam meñ
har qatra samundar ho aao ye duā māñgeñ

ye ham ne maanā ki tum meñ sūraj kī sī tapish hai magar ye sun lo
ki ham samundar haiñ aur āsāñ nahīñ samundar ubaal denā

apne aañsū sambhāl kar rakhnā
ik samundar kabhī banā.eñge

'bāqar' is āftāb meñ jauhar hai is qadar
aa jaa.e josh meñ to samundar ubaal de

ishq meñ dil kā ye manzar dekhā
aag meñ jaise samundar dekhā

nadī ho taal samundar yā dasht ho koī
sabhī ke lab pe hī dekhī hai tishnagī maiñ ne

ik safīna hai tirī yaad agar
ik samundar hai mirī tanhā.ī

tumhī nahīñ the samundar ke pāniyoñ kī tarah
kabhī sukūn kabhī iztirāb thā maiñ bhī

zindagī itnī pareshāñ hai ye sochā bhī na thā
us ke atrāf meñ sholoñ kā samundar dekhā

samundar ho ki sahrā ho gul-o-gulzār ho chāhe
ye ham hī log haiñ jo har nagar ābād karte haiñ

hijrāñ ke samundar meñ hayūlā thā kisī kā
imkāñ ke bhañvar se koī ubhrā use kahnā