Tags-Samundar

husain hī thā jo pyāsā uThā furāt se vo
lahūluhān samundar thā apnī zaat se vo

zamīñ se falak tak chhalaktā samāñ hai
havā meñ samundar uThāne lagī hai

pyāse haiñ jaise ek samundar meñ rah ke ham
tere baġhair zindagī karne kā Dhab na pūchh

mire sheroñ meñ bahtā hai samundar mere virse kā
ki maiñ gulshan-tarāz-e-rañg-e-sohbāñ huuñ na ḳhāqānī

ik samundar ke havāle saare ḳhat kartā rahā
vo hamāre saath apne ġham ġhalat kartā rahā

kuud ga.e sab riñd samundar meñ 'shāhid'
saaqī ne bas jaam likhā thā sāhil par

ab ye ehsās ki duniyā meñ koī merā nahīñ
jaane kab mujh ko samundar ke havāle kar de

kuchh to ho raat kī sarhad meñ utarne kī sazā
garm sūraj ko samundar meñ Duboyā jaa.e

yuuñ bhī ik baar to hotā ki samundar bahtā
koī ehsās to dariyā kī anā kā hotā

maiñ samundar pe hañstā rahūñgā
yā mirī tishnagī ye bujhā.e

na sahrā na parbat na koī gulistāñ faqat ab samundar bulātā hai mujh ko
ki har shai samundar se aa.ī samundar meñ jā kar milegī

kareñge yūñhī sadā intizār sāhil par
guhar tahoñ se samundar ne jo uchhālā nahīñ

ye biphartī mauj andeshe samundar aur maiñ
Dūbtī sāñseñ hathelī par mirā sar aur maiñ

maiñ samundar huuñ koī tū siipī
merī gahrā.iyoñ meñ chīḳh uThe

zikr karte haiñ tirā naam nahīñ lete haiñ
ham samundar ko jazīra nahīñ hone dete

kisī āseb-zada dil kī sadā hai kyā hai
ye mire saath samundar hai havā hai kyā hai

mehvar pe bhī gardish mirī mehvar se alag ho
us bahr meñ tairūñ jo samundar se alag ho

gahrā.iyāñ simaT ke bikharne lagīñ tamām
ik chāñd kyā dikhā ki samundar uchhal paḌe

bam phūTne lageñ ki samundar uchhal paḌe
kab zindagī pe kaun bavanDar uchhal paḌe

tishnagī jism ke sahrā meñ ravāñ rahtī hai
ḳhud meñ ye mauj samo leñ to samundar ho jaa.eñ