Tags-Samundar

rāt-din pur-shor sāhil jaisā manzar mujh meñ thā
tum se pahle maujzan koī samundar mujh meñ thā

barq-e-guftār sahī sho.ala vo talvār sahī
ham magar zarf bhī rakhte haiñ samundar kī tarah

tirī sadā kā hai sadiyoñ se intizār mujhe
mire lahū ke samundar zarā pukār mujhe

ham musībat ke maare mohabbat nahīñ kar sakte
mohabbat agar mahbūb kī bāñhoñ meñ bāñheñ Daale samundar ke kināre chalne kā naam hai

us chhalakte se samundar meñ nasha hai aaj tak
jhuum kar barsā hai pāgal uf ye bādal kaun hai

abhī to maiñ ne faqat bārishoñ ko jhelā hai
ab is ke ba.ad samundar bhī dekhnā hai mujhe

kisī ke saath huuñ aise azal se
samundar saath jaise tishnagī hai

ḳhuuñ ke ye dhāre ham ne pahlī baar nahīñ dekhe
lekin ab in dariyāoñ meñ samundar girte haiñ

jā ke vo barsā na-jāne kis samundar par 'shabāb'
aah jo bādal mirī jhīloñ kā paanī pī gayā

an-ginat shādāb jismoñ kī javānī pī gayā
vo samundar kitne dariyāoñ kā paanī pī gayā

ghirā huā huuñ maiñ kab se jazīra-e-ġham meñ
zamāna guzrā samundar meñ mauj aa.e hue

lamhe añdhere dasht meñ piite rahe mujhe
mujh meñ thā raushnī kā samundar maiñ chup rahā

dil kī gahrā.ī meñ kyā hai mujh se ai 'saulat' na pūchh
jitne dariyā aañkh se nikle samundar kar diye

silsila maujoñ kā jaarī hai yahāñ
aao āñkhoñ meñ samundar dekho

maiñ samundar bhī huuñ motī bhī huuñ ġhota-zan bhī
koī bhī naam mirā le ke bulā le mujh ko

koī Duubī huī kashtī hai ki sāhil kā nishāñ
apnī sochoñ ke samundar se ubhar kar dekho

lab par ugā.ūñ us ke dhanak phuul qahqahe
ā.ankhoñ meñ us kī phailā samundar sameT luuñ

badī kā sabz samundar pukārtā hai use
vo nekiyoñ kī sabhī kashtiyāñ Dubo.egā

sard jañgal kī siyāhī paaT kar nikle hī the ham
āḳhirī kirnoñ ko tah kartā samundar sāmne thā

chand qatre us kī āñkhoñ meñ mile 'āzar' magar
vo samundar ban ke sab pyāse gharoñ meñ baT gayā