Tags-Samundar

jab tak rahī jigar meñ lahū kī zarā sī buuñd
muTThī meñ apnī band samundar lagā mujhe

vo log bhī to kināroñ pe aa ke Duub ga.e
jo kah rahe the samundar haiñ sab khañgāle hue

merī āñkhoñ kī samundar meñ utarne vaalā
aisā lagtā hai mujhe aur rulānā chāhe

ret kī daldal milī mujh ko samundar paar bhī
maiñ vahāñ utrā jahāñ sāhil kabhī sāhil na thā

kal shaam vo tanhā thā samundar ke kināre
kyā soch rahe ho koī aḳhbār to dekho

sukūt-e-shām samundar parindagāñ sūraj
ye lamha lamha badaltā huā jahāñ sūraj

zehn meñ dā.ere se banātā rahā duur hī duur se muskurātā rahā
maiñ samundar nahīñ chāñd ko ilm hai raat bhar phir bhī mujh ko bulātā rahā

ḳhirāmāñ ḳhirāmāñ clifton pe aa kar
samundar kī machhlī na hañstī na phañstī

ye merī kāġhzī kashtī hai aur ye maiñ huuñ
ḳhabar nahīñ ki samundar kā faisla kyā hai

ik samundar ne āvāz dī
mujh ko paanī pilā dījiye

ham samundar se milne zarā der se pahuñche
raat samundar se ziyādā gahrī ho rahī thī

raaz maujoñ ke samundar ne batā.e haiñ mujhe
yahāñ Dūbūñgā kahīñ aur ubhar jā.ūñgā

ye sarkash samundar nikal pāoge jab
junūñ saañs lene kā sar par chaḌhā ho

vo zabt na kar pā.eñgī āñkhoñ ke samundar
tum rāh-guzāroñ se mirā zikr na karnā

kab kisī gahre samundar ko havā samjhegī
sat.h par tairtī maujoñ ko navā samjhegī

falak sahrā samundar boltā hai
tilism-e-ḳhvāb shab-bhar boltā hai

pighaltī jā rahī hai barf saarī
tabāhī kā samundar boltā hai

maiñ ek qatra huuñ lekin mirā nasīb to dekh
ki be-qarār mire ġham meñ ik samundar hai

zanjīr zulf-e-siyāh samundar nigāh-e-shoḳh
jā.ūñ kahāñ farār kā rasta koī to ho

mirā dil Dūbne lagtā hai jab ġham ke samundar meñ
mirī kashtī ko sāhil se lagāne kaun aatā hai