Tags-Saqi

asar na pūchhiye saaqī kī mast āñkhoñ kā
ye dekhiye ki koī hoshyār baaqī hai

mahfil-e-sāqī meñ thā kuchh aur hī mastoñ kā rañg
koī sāġhar DhūñDhtā thā aur koī behosh thā

sāġhar kyuuñ ḳhālī hai mirā ai saaqī tire maiḳhāne meñ
phir Daal de ulfat kī nazreñ ik baar mire paimāne meñ

nizām-e-mai-kada saaqī badalne kī zarūrat hai
hazāroñ haiñ safeñ jin meñ na mai aa.ī na jaam aayā

bosoñ meñ mazā qand-e-mukarrar kā ho saaqī
ik daur dobāra kā bhī Dhal jaa.e to achchhā

mahrūm huuñ is daur meñ saaqī faqat ik maiñ
ai kaash ḳhum-e-bāda ubal jaa.e to achchhā

saaqī kī nigāhoñ kā paiġhām nahīñ aatā
jis jaam kā tālib huuñ vo jaam nahīñ aatā

saaqī ke rūThne par rindoñ meñ barhamī hai
sāġhar se aaj sāġhar Takrā.e jā rahe haiñ

āñkhoñ ko mirī paḌh kar saaqī ne kahā hañs kar
īqān zarā mushkil mai-ḳhvār kī bāteñ haiñ

ḳhatar kyā kashti-e-mai ko bhalā mauj-e-havādis kā
na beḌā paar ho kyūñkar ki ḳhud saaqī hai yaar apnā

jo mai ko Dhaal bhī leñ ham to saaqī ke ishāre par
nahīñ is ke alāva mai-kade meñ iḳhtiyār apnā

lutf-e-sāqī aam thā par vā-e-baḳht andalīb
jām-e-gil bekār niklā sāġhar-e-ab.har ḳharāb

qālib-e-ḳhākī meñ saaqī tū ne phūñkī hai ye ruuh
qulqul-e-mīnā se paidā shor-e-mastāna huā

chashm-e-sāqī se piine ko maiñ jo gayā pārsā.ī kā merī bharam khul gayā
ban rahā hai jahāñ meñ tamāshā mirā hosh mujh ko na aa.e to maiñ kyā karūñ

dāman-e-rind-e-balā-nosh ko dekh ai saaqī
parcham-e-ḳhvājgī-e-kaun-o-makāñ hai ki nahīñ

shikāyat tujh se kyā saaqī ki hai tāḳhīr kā aadī
sitam duniyā meñ lekin is se baḌh kar ho nahīñ saktā

mai-e-be-rañg kā sau rañg se rusvā honā
kabhī mai-kash kabhī saaqī kabhī miinā honā

kab pilāvegā tū ai saaqī mujhe jām-e-sharāb
jāñ-ba-lab huuñ aarzū meñ mai kī paimāne kī tarah

sharāb-e-ishq kā sāġhar diyā hai mujh ko saaqī ne
na uTThūñgā maiñ mahshar ko bhī apnī sargirānī se

ba-qadr-e-zarf hai saaqī ḳhumār-e-tishna-kāmī bhī
jo tū dariyā-e-mai hai to maiñ ḳhamyāza huuñ sāhil kā