Tags-Saqi

mudām kaifiyyat apne dil meñ mai-e-mohabbat ke nashshe kī hai
ki saaqī is āftāb se hai dimāġh raushan murād hāsil

ik aisā vaqt bhī aatā hai chāñdnī shab meñ
mirā dimāġh mirā dil kahīñ nahīñ hotā

jitne saaqī the mire sab nazr-e-tūfāñ ho ga.e
aur kosoñ duur hai sāhil kise āvāz duuñ

zahr kā jaam hī de zahr bhī hai āb-e-hayāt
ḳhushk-sālī kī to ho jaa.e talāfī saaqī

zulmat o nuur ko pyāloñ meñ samo detī hai
shaam paḌte hī tirī chashm-e-ġhilāfī saaqī

ik kaf-e-jū hai matā-e-ḳhirad o sikka-e-hosh
jām-e-mai de ki ye aalam hai izāfī saaqī

talḳh-tar aur zarā bāda-e-sāfī saaqī
mere siine meñ ḳhas-o-ḳhār haiñ kaafī saaqī

kaaT dī gardish-e-ayyām kī zanjīr us ne
kaun hai gardish-e-mīnā ke munāfī saaqī

zindagānī kā maraz kam nahīñ hone paatā
ye maraz kam na ho allāh hai shāfī saaqī

nashsha-e-mai se zarā zaḳhm ke Tāñke TuuTe
tā-abad silsila-e-sīna-shigāfī saaqī

qayām-e-mai-kada ke vāste iqrār kyuuñ saaqī
pilā.egā to rah jā.eñge aur vaise nahīñ rahte

ḳhayāl ik chashm-e-maigūñ kā sadā masrūr rakhtā hai
yahāñ kyā kaam hai saaqī sharāb-e-arġhavānī kā

nahīñ detā jo mai achchhā na de terī ḳhushī saaqī
piyāle kuchh hamesha taaq par rakkhe nahīñ rahte

ye to bajā ki ab vo kaif jām-e-sharāb meñ nahīñ
sāqī-e-mai ke ġhamza-e-hosh-rubā ko kyā huā

baḌhā.e hausle dariyā-dilī ne saaqī kī
zarā se jaam meñ sau baar āftāb aayā

dekhnā garmī kī ḳhūbī merī baarī jab aa.e
jā-e-mai saaqī ne bhar dī mire paimāne meñ aag

pilā de aaj ki marte haiñ riñd ai saaqī
zarūr kyā ki ye jalsa ho hauz-e-kausar par

kyuuñ nahīñ miltā abhī tak tishna-lab haiñ bāda-ḳhvār
kyā tirā sāġhar bhī saaqī jām-e-kausar ho gayā

ruuh kis mast kī pyāsī ga.ī mai-ḳhāne se
mai uḌī jaatī hai saaqī tire paimāne se

jab kabhī dair-o-haram Takrā.e mai-ḳhānoñ ke saath
sarf-e-gardish kar diyā saaqī ne paimānoñ ke saath