Tags-Saqi

saaqī hai shab kī dast-darāzī kā kyā gila
pyāre jo be-ḳhudī meñ huā mo'tabar nahīñ

saaqī firāq-e-jānāñ halq apne kā hai darbāñ
utre gale se phir yaañ qirt-e-sharāb kyuuñ kar

jab naqd maal tū ne diyā ham ne naqd-e-dil
saaqī hameñ batā de ki pī thī udhār kab

yahāñ jo kuchh bhī hai vo partav-e-ehsās hai saaqī
ba-juz baada javāb-e-gardish-e-ayyām kyā hogā

mirī nigāh meñ vo riñd hī nahīñ saaqī
jo hoshiyārī o mastī meñ imtiyāz kare

milte hī sāġhar-o-shīsha se chhalak jaatā hai
ye bhī kyā daur hai saaqī tire paimāne kā

hashr meñ dekh ke majma.a lab-e-kausar saaqī
phir gayā āñkhoñ meñ naqsha tire maiḳhāne kā

maiñ sharāb piitā to kis tarah mujhe tere hukm kā paas thā
magar aaj saaqī ne jab diye mujhe vāste tire naam ke

ham ko vaa.iz kā bhī dil rakhnā hai saaqī kā bhī dil
ham to tauba kar ke bhī pāband-e-maiḳhana rahe

aaj to saaqī se ye 'bahzād' ne bāñdhā hai ahd
lab pe tauba ho magar hāthoñ meñ paimāna rahe

nahīñ piitā na pī zāhid magar ye to samajh letā
agar saaqī ne mai āñkhoñ se barsā.ī to kyā hogā

na band kar ise fasl-e-bahār meñ saaqī
na Daal duḳhtar-e-raz kā achār shīshe meñ

mai-kade ke faqīr ai saaqī
kab kisī se savāl karte haiñ

pilvā de mai-e-hosh-rubā dekh mirā zarf
saaqī jo bahak jā.ūñ to dīvāna samajhnā

saaqī vo mai pilā ki hamesha rahe surūr
mahfil meñ mujh sā bāda-kash-e-mo'atabar bhī hai

nahīñ darkār mai ham ko piye jā tū hī ai saaqī
hameñ to mast kartā hai tirā sarshār ho jaanā

har-samt tāzgī sī jharnoñ kī naġhmagī se kitnī
mushābahat hai saaqī tirī hañsī se

bazm saaqī ne dī ulaT saarī
ḳhuub bhar bhar ke ḳhum luñDhā.ī aaj

tez ho dast-e-sitam de bhī sharāb ai saaqī
teġh gardan pe sahī jaam sipar hai ki nahīñ

chhabīle mast saaqī ke pichheñ dauḌe sau maḳhmūrāñ
pilāo mai havā ab to huā hai gul-fishānī kā