Tags-Saqi

kuchh zahr ko taraste haiñ kuchh mai meñ ġharq haiñ
saaqī ye terī bazm kā kyā intizām hai

har ek jaam pe ye naġhma-e-hazīñ saaqī
ki is javāni-e-fānī kā e'tibār nahīñ

chashm-e-tar par gar nahīñ kartā havā par rahm kar
de le saaqī ham ko mai ye abr-e-bārāñ phir kahāñ

chashma-e-faiz hai kyā zaat mire saaqī kī
ek qatre ko kahā jis ne samundar paayā

maut ik amr-e-musallam hai to phir ai saaqī
ruuh kyuuñ ziist ke ālām se ghabrātī hai

mirī pyaas baḌh rahī hai mirā dil sulag rahā hai
jo nahīñ hai jaam saaqī to nigāh se pilā de

pilā saaqī ki shaġhl-e-mai-kashī kā vaqt jaatā hai
yūñhī chhā.ī rahe kaalī ghaTā ye ho nahīñ saktā

banā hai mai-kada ahl-e-havas kī bazm ai saaqī
tirā tark-e-ta.alluq dekhnā jaane na kyā kar de

qatre haiñ kausar-o-tasnīm kaf-e-sāqī meñ
ḳhum-e-aflāk to paimāne haiñ mai-ḳhānoñ ke

besh o kam kā shikva saaqī se 'mubārak' kufr thā
daur meñ sab ke ba-qadr-e-zarf paimāna rahā

nigāh rakhte haiñ saaqī vo terī āñkhoñ par
sukūn-e-dil ke jo pyāle talāsh karte haiñ

de mujh ko bhī is daur meñ saaqī sipar-e-jām
har mauj-e-havā khīñche hai shamshīr havā par

piyūñgā aaj saaqī ser ho kar
mayassar phir sharāb aa.e na aa.e

hamāre vāste saaqī piyāla-o-ḳhum ek
chhalak chaleñ jo vo hote haiñ aur paimāne

saaqī tire lutf-e-ām se ham vāqif haiñ magar ye yaad rahe
is daur meñ kam raas aatī hai shīshe ko duā paimāne kī

na ahl-e-mai-kada ne muskurā kar baat kī ham se
na terī hī jabīñ se be-ruḳhī ke bal ga.e saaqī

saaqī mujhe bhī chāhiye ik jām-e-ārzū
kitne lageñge daam! zarā aañkh to milā

ye jaam ye subū ye tasavvur kī chāñdnī
saaqī kahāñ mudām! zarā aañkh to milā

ab vo saaqī kī bhī āñkheñ na rahīñ rindoñ meñ
ab vo sāġhar bhī chhalakte nahīñ mai-ḳhānoñ meñ

bazm-e-mai be-ḳhud-o-be-tāb na kyuuñ ho saaqī
mauj-e-bāda hai ki dard uThtā hai paimānoñ meñ