Tags-Saqi

sar chaḌhā.eñ kabhī āñkhoñ se lagā.eñ saaqī
tere hāthoñ kī chhalak jaa.e jo paimāne se

saaqī bhī hai sharāb bhī āzādiyāñ bhī haiñ
sab kuchh hai intizām chalo mai-kade chaleñ

ho salīqe se bahaknā to maza detā hai
mire saaqī ko gumāñ hai ki bahut hosh meñ huuñ

kahāñ kī tauba ye mauqā hai phuul uḌāne kā
chaman hai abr hai saaqī hai yaar ham bhī haiñ

nigāh-e-sāqī kī muskurā.ī kahā jab 'aḳhtar' ne apnī dhan meñ
piyeñge piite raheñge mai-kash magar ye ḳhāna-ḳharāb pahle

saaqī vo ḳhaas taur kī ta.alīm de mujhe
us mai-kade meñ jā.ūñ to pīr-e-muġhāñ rahūñ

mai-kade vāloñ se dabne lage masjid vaale
daur saaqī kā hai guzrā vo zamān-e-vā.iz

qulqul-e-shīsha-e-mai se tire mai-kash saaqī
sun rahe haiñ ḳhabar-e-rāz-e-nihān-e-vā.iz

saaqī tirī āñkhoñ meñ haiñ do-jām chhalakte
mai-ḳhāne kī mastī tirī āñkhoñ meñ bharī hai

shab ḳhumār-e-shauq-e-sāqī rustaḳhez-andāza thā
tā-muhīt-e-bāda sūrat ḳhāna-e-ḳhamyāza thā

saaqī sharāb lā ki tabī.at udaas hai
mutrib rubāb uThā ki tabī.at udaas hai

'karan' ye kaun kahe baḌh ke mere saaqī ko
ki us ke hāthoñ se ik jaam chāhtā huuñ maiñ

sāqī-garī kā farz adā kar diyā gayā
paanī kā ghūñT zahr milā kar diyā gayā

mast āñkhoñ hī se pilā saaqī
jaam se be-ḳhudī nahīñ hotī

haa.e gardish vo chashm-e-sāqī kī
maiñ ye samjhā ki jaam chaltā hai

mai-kade meñ mire saaqī kā nayā hukm ye hai
shaam ko pyaas lage sub.h ko paanī māñge

merī mai-noshī pe saaqī kah uThā
itnī piite ho ki bas tauba bhalī

Kaif-e-sehba-e-Tarab meñ ġharq-e-maiḳhāna hai aaj
har shajar sāqī-e-mai har phuul paimāna hai aaj

chhalaktī aa.e ki apnī talab se bhī kam aa.e
hamāre sāmne saaqī ba-sāġhar-e-jam aa.e

nikāl parda-e-mīnā se duḳhtar-e-raz ko
ghaTā meñ kis liye ye māhtāb hai saaqī