Tags-Saqi

īmān o diiñ se 'tābāñ' kuchh kaam nahīñ hai ham ko
saaqī ho aur mai ho duniyā ho aur ham hoñ

use kyuuñ mai-kada kahtā hai batlā de mire saaqī
yahāñ kī sar-zamīñ ḳhuld-e-barīñ mālūm hotī hai

ye mahfil-e-ahl-e-dil hai yahāñ ham sab mai-kash ham sab saaqī
tafrīq kareñ insānoñ meñ is bazm kā ye dastūr nahīñ

mujh se baḌh kar hai kahīñ un kā maqām ai saaqī
mast rahte haiñ jo be-bāda-o-jām ai saaqī

'zeb' bhī arz-e-haqīqat meñ hai aksar mohtāt
ahl-e-mahfil meñ ye ehsās hai aam ai saaqī

marhamat se tirī ho jaa.eñ na mai-kash bad-dil
sañg-dil hai tirī mahfil kā nizām ai saaqī

qatre qatre ko phireñ tere subū-kash lāchār
hai ye kis ke liye ġhairat kā maqām ai saaqī

ye terā farz hai saaqī mile sabhī ko barābar
hai terā mansab saaqī koī ḳhitāb nahīñ hai

saaqī ne lagī dil kī is tarah bujhā dī thī
ik buuñd chhiḌak dī thī ik buuñd chakhā dī thī

havas-e-mutrib-o-sāqī meñ pareshāñ akasr
abr aatā hai kabhī māh-e-tamām aatā hai

abhī na de mujhe izn-e-bahār ai saaqī
abhī hayāt sitāroñ se ham-kalām nahīñ

sau girah thī dil meñ mere ḳhosha-e-añgūr juuñ
ek pyāle siiñ kiyā saaqī neñ hall-e-mushkilāt

jo mast hai saaqī nigah-e-mast kā vo tū
minnat-kash-e-jām-o-mai-o-mīnā nahīñ hotā

piite raho sharāb jahāñ tak ki ho sake
shāġhil na chhūTe saaqī kā dāmāñ kisī tarah

jab kabhī saaqī ne 'ja.afar' apnī nazreñ pher liiñ
mai-kade meñ pī liyā hai maiñ ne armāñ kā lahū

mujh ko saaqī ne jo ruḳhsat kiyā mai-ḳhāne se
ḳhud mai-e-nāb chhalakne lagī paimāne se

saaqī ne vā kiyā dar-e-mai-ḳhāna-e-hayāt
fitrat kī chashm-e-mehr pashemāñ hai āj-kal

bazm-e-sāqī meñ agar laġhzish huī
haath se mai kī pyālī jā.egī

aks-e-abrū dekhte haiñ bāda-e-sar-josh meñ
iid hai sāqī-parastoñ meñ hilāl-e-jām kī

vahī saaqī vahī sāġhar vahī shīsha vahī baada
magar lāzim nahīñ har ek par yaksāñ asar honā