Tags-Saqi

aur kuchh din ye dastūr-e-mai-ḳhāna hai, tishna-kāmī ke ye din guzar jā.eñge
mere saaqī ko nazreñ uThāne to do, jitne ḳhālī haiñ sab jaam bhar jā.eñge

shīshe kī parī tujh meñ kyā husn kā aalam hai
saaqī na ho phir bhī to ye ghar hai parī-ḳhāna

kyā tasavvur thā chashm-e-sāqī kā
raat bhar ham subū meñ kho.e rahe

chashm-e-sāqī kī qasam thā ye bahāna varna
kahīñ karte haiñ mai-o-jām ke pyāse tauba

mai jo dī ġhair ko saaqī ne karāhat dekho
shīsha-e-mai ko maraz ho gayā ubkā.ī kā

us jagah bazm saaqī ne biThāyā hai hameñ
haath phailā.eñ to jaatā nahīñ paimāne tak

dekhiye mahfil-e-sāqī kā natīja kyā ho
baat shīshe kī pahuñchne lagī paimāne tak

bazm-e-sāqī meñ jo āvāz nahīñ qulqul kī
is qadar aaj ye kyuuñ pamba-dahāñ hai shīsha

paañv rakhtā hī nahīñ naaz se bālā-e-zamīñ
kaf-ba-kaf bazm meñ saaqī kī ravāñ hai shīsha

har-chand ki sāġhar kī tarah josh meñ rahiye
saaqī se mile aañkh to phir hosh meñ rahiye

mai rahe miinā rahe gardish meñ paimāna rahe
mere saaqī tū rahe ābād mai-ḳhāna rahe

sar-e-mai-kada tishnagī kī vo qasmeñ
vo saaqī se bāteñ banāne kī rāteñ

chashm-e-sāqī ho mehrbān agar
ḳhvāhish-e-bāda-o-subū na rahe

jām-o-mīnā ko chhoḌ kar dekho
chashm-e-sāqī kā ye nasha kyā hai

kisī ik-ādh mai-kash se ḳhatā kuchh ho ga.ī hogī
magar kyuuñ mai-kade kā mai-kada bad-nām hai saaqī

dī hai 'nayyar' mujh ko saaqī ne ye kaisī ḳhaas mai
sab kī nazreñ uTh rahī haiñ mere sāġhar kī taraf

zabāñ kā zā.iqa bigḌā huā hai mai pilā saaqī
sumūm-e-dasht ne sab rakh diye kām-o-dahan tal kar

dast-e-nāzuk se mujhe jaam diyā saaqī ne
aabrū baḌh ga.ī ....aur aaj se mai-ḳhvāroñ meñ

āñkhoñ ke gulābī Doroñ meñ ik kaif sā paayā jaatā hai
mai-ḳhvār-e-mohabbat hosh meñ aa saaqī kī nazar hai jaam nahīñ