Tags-Saqi

ye baat alag hai paas rahā kuchh tishna-labī kī ġhairat kā
ham par bhī rahā saaqī kā karam ham tak bhī bahut se jaam aa.e

ye dil meñ soch ke tauba bhī toḌ dī maiñ ne
na jaane kyā kahe saaqī agar na pī maiñ ne

aam bārāñ kī tarah se hai karam saaqī kā
aa.ī barsāt ki maiḳhāne ke dar khol diye

shīsha-o-jām-o-subū bhar le mai-e-gul-rañg se
aaj saaqī ghir ke aa.ī hai ghaTā achchhī tarah

vo kashti-e-mai de ab ke saaqī
jis meñ khevā ho paar merā

bhar ke saaqī jām-e-mai ik aur lā aur jald lā
un nashīlī añkhḌiyoñ meñ phir hijāb aane ko hai

jaam miinā baada saaqī thā ye sab 'nāzim' vahāñ
par mirī qismat ki ḳhālī merī jā thī maiñ na thā

jaam miinā baada saaqī chañg daf barbat rabāb
nahr gulshan chāñdnī sabza fazā thī maiñ na thā

mai-kada terā rahe ābād ḳhum kī ḳhair ho
haañ pilā de mujh ko saaqī jis qadar shīshe meñ hai

ye raah par aa hī jā.egā tū zāhid se māyūs na ho
uTh le ke ḳhudā kā naam ki saaqī raat guzarne vaalī hai

ai rindo haath pe haath dhare kyā saaqī kā muñh takte ho
mahfil meñ mache kohrām ki saaqī raat guzarne vaalī hai

ham kitnī piine vaale haiñ tum kitnī pilāne vaale ho
ye raaz hai tasht-az-bām ki saaqī raat guzarne vaalī hai

ḳhurshīd ko jaam se sharmā.eñge shaam ko terā va.ada thā
īfā-e-ahd-e-shām ki saaqī raat guzarne vaalī hai

ab koī nahīñ sannāTā hai tāroñ kī āñkheñ jhapkī haiñ
chal saath mire do-gām ki saaqī raat guzarne vaalī hai

aatā hai nazar anjām ki saaqī raat guzarne vaalī hai
baaqī hai ḳhudā kā naam ki saaqī raat guzarne vaalī hai

ye barham hone vaalī mahfil yuuñ bhī barham ho jaatī
ham kah ke hue badnām ki saaqī raat guzarne vaalī hai

bahār aa.ī hai sadme se hamārā haal abtar hai
ghaTā ghanghor chhā.ī hai na saaqī hai na sāġhar hai

chashm-e-sāqī meñ jām-e-jam kī qasam
rañg-e-duniyā-o-dīñ chhalaktā hai

miTāyā daur-e-sāqī mohtasib ne
adū jamshed kā zahhāk niklā

pilā de ok se saaqī jo ham se nafrat hai
piyāla gar nahīñ detā na de sharāb to de