Tags-Saqi

bas ik sharāb-e-kuhan ke karishme haiñ saaqī
na.e zamāne na.ī mastiyāñ na.ī barsāt

abr dariyā sabza saaqī yaar mutrib duḳht-e-raz
'mehr' hai in saat chīzoñ kā mazā barsāt meñ

rakh ke ai saaqī ḳhum-e-mai meñ bahā denā mujhe
bāda-kash huuñ aa.egī merī qazā barsāt meñ

chāhtā huuñ jise ban jaa.e agar vo saaqī
baḌhtī jaa.e havas-e-kausar-o-jannat dil meñ

ġhurūr-e-tishna-sāqī bhī hai koī shai saaqī
taqāzā ham nahīñ karne ke jaam jaam ke ba.ad

ye muġhbache tire saaqī abhī haiñ ḳhīra bahut
har ek jām-e-tahī aur salā-e-ām ke ba.ad

laḌtī na jaa.e aañkh jo saaqī se 'sheftā'
ham ko to ḳhaak lutf na aa.e sharāb meñ

sadqa mai-ḳhāne kā saaqī mujhe be-hoshī de ḳhud-farāmoshī de
yuuñ to sab kahte haiñ 'bedam' tirā mastāna tirā ab huuñ dīvāna tirā

sahbā-e-tund-o-tez ko saaqī sambhālnā
uchhle kahīñ na shīsha-o-sāġhar liye hue

dekh lī saaqī kī bhī dariyā-dilī
lab na hamāre kabhū tar kar gayā

hameñ sāġhar-e-bāda ke dene meñ ab kare der jo saaqī to haa.e ġhazab
ki ye ahd-e-nashāt ye daur-e-tarab na rahegā jahāñ meñ sadā na rahā

saaqī mai sāġhar paimāna mere bas kī baat nahīñ
sirf inhī se dil bahlānā mere bas kī baat nahīñ

mai-kashī chhoḌ dī is vāste ham ne saaqī
pahle jaisī tirī āñkhoñ meñ ḳhumārī na rahī

ham vo mai-kash haiñ jo hotā hai hameñ ranj-e-ḳhumār
TūTte haiñ sāqi-e-paimāñ-shikan ke haath paañv

ye nizām-e-bazm-e-sāqī kahīñ rah sakegā baaqī
ki ḳhushī to chand lamhe ġham o dard jāvedānī

kufr hai saaqī pe ḳhissat kā gumāñ
tishna sargarm-e-taqāzā chāhiye

subū na jaam na miinā se mai pilā be-shak
pilā.e jā mire saaqī yūñhī nazar se mujhe

chashm-e-sāqī kā tasavvur bazm meñ kaam aa gayā
bhar ga.ī shīshoñ meñ mai gardish meñ ḳhud jaam aa gayā

tāsīr na hotī jo mirī chashm-e-fusūñ meñ
shīshe sā na saaqī kabhī girtā mire aage

aaj har qatra-e-mai ban gayā ik chiñgārī
thī ye saaqī kī sharārat mujhe ma.alūm na thā