Tags-Saqi

saaqī ga.ī bahār rahī dil meñ ye havas
tū minnatoñ se jaam de aur maiñ kahūñ ki bas

saaqī ke kaif-e-bāda-e-pārīna kī qasam
science ke jadīd ḳhazāne meñ kuchh nahīñ

ḳhudā ke vāste muñh se lagā de ḳhum ke ḳhum saaqī
baḌā ghanghor bādal jānib-e-mai-ḳhāna aatā hai

saaqī hai na mai hai na daf-o-chañg hai holī
kyā haal hai imsāl ye kyā rañg hai holī

chashm-e-sāqī se girā jaatā hai zarf-e-mai-kashāñ
toḌ deñ sāġhar jinheñ ehsās-e-besh-o-kam huā

aap hī baada huuñ maiñ aap hī saaqī 'maḳhmūr'
sāġhar āñkhoñ meñ mirī aur hai miinā dil meñ

ba-rañg-e-sāġhar milā diyā muñh jo muñh se tere ḳhafā na honā
kiyā hai behosh tū ne saaqī sharāb mujh ko pilā pilā kar

duā lab-e-jām ne bhī māñgī subū ne bhī haath uThā uThā kar
hamārī mahfil meñ aayā saaqī ḳhudā ḳhudā kar ḳhudā ḳhudā kar

chalā hai mahfil se apne saaqī dikhā.ūñ maiñ apnī ashk-bārī
karūñ bat-e-mai ko murġh-e-ābī abhī se dariyā bahā bahā kar

bahkī bahkī hoñ us kī bāteñ
saaqī saaqī pukārtā ho

fazā maġhmūm hai saaqī uThā chalkā.eñ paimāna
añdherā baḌh chalā hai lā zarā qindīl-e-mai-ḳhāna

ahl-e-mahfil dekhte hī 'saif' be-ḳhud ho ga.e
har adā saaqī kī sharh-e-jām ho kar rah ga.ī

jalva-e-ruḳhsār-e-sāqī sāġhar-o-mīnā meñ hai
chāñd uupar hai magar Duubā huā dariyā meñ hai

tañg ho kar tire har baar ke dahkāne se
kos baiThe na koī riñd-e-sharābī saaqī

phuul māñgūñ to pilātā hai barāñDī saaqī
kartā hai bazm-e-guzishta kī talāfī saaqī

maraz-e-hijr meñ mai garche muzir hai lekin
maiñ to pī jaatā huuñ allāh hai saaqī saaqī

dekhiye sohbat-e-nā-jins nibhegī kyūñ-kar
past-himmat tū tabī.at mirī aalī saaqī

nafs-e-garm kī tāsīr ne mai sāġhar se
sho.ala-e-lafz ke mānind uḌā dī saaqī

sirf lillāh bhī mai-ḳhāne meñ jaarī kar de
muqtazī ho jo tirī himmat-e-ālī saaqī

tū ne kyā ātish-e-hal-karda pilā dī saaqī
bhuun Daalā hai jigar aag lagā dī saaqī