Tags-Saqi

sharāb pī bhī to pī chashm-e-mast saaqī se
magar chaḌhā.e piyā pe ġham-e-hayāt ke jaam

hijr-e-sāqī meñ dahan se mire uchchhū ho kar
jo piyūñ āb-e-baqā bhī vo nikal ghuuT paḌe

tire laboñ ke sivā kuchh nahīñ mayassar jab
so fikr-e-sāġhar-o-sāqī-o-bāda kyā karnā

de de chullū meñ ikaTThī kar ke ai saaqī mujhe
kuchh abhī to ḳhum meñ hai shīshe meñ hai sāġhar meñ hai

saaqī bachā lī aabrū tū ne ḳhud apnī aaj
varna mirī manzar meñ ka.ī mai-kade the aur

ḳhayāl un kā pare hai arsh-e-āzam se kahīñ saaqī
ġharaz kuchh aur dhun meñ is ghaḌī mai-ḳhvār baiThe haiñ

jo tishna-kām tire mai-kade meñ hoñ saaqī
mire lahūñ se vo labrez apne jaam kareñ

shor-e-mahshar uThā har samt se mai-ḳhāne meñ
jaane kyā Daal diyā saaqī ne paimāne meñ

mai-kadā terā salāmat saaqī
aa ga.e the yūñhī piine ke liye

hoñToñ pe aaj tak haiñ shab-e-aish ke maze
saaqī kā lab liyā lab-e-paimāna chhoḌ kar

judā ho jab yaar apnā saaqī kahāñ kī sohbat sharāb kaisī
pilā.eñ gar ḳhizr āb-e-haivāñ ham us ko samjheñ yahī ki sam hai

baada ba-qadr-e-zarf sahī rasm-e-mai-kada
saaqī nazākat-e-dil-e-mai-ḳhvār dekh kar

ḳhudī kī pāsdārī meñ sukūn-e-jāñ gañvā baiThe
bayābāñ meñ bhaTakte haiñ chaman se duur haiñ saaqī

sabhī māsūm-o-sādiq lā.eq-e-tāzīr ho baiThe
tirī sarkār ke kaise ajab dastūr haiñ saaqī

taqarrub-hā-e-afsar hai na aish-e-murġh-o-māhī hai
abhī daftar ke aane par bhī ham majbūr haiñ saaqī

idhar ġhairat kī ḳhushkī hai na gūlar hai na berī hai
magar jis samt chamche haiñ udhar añgūr haiñ saaqī

shikasta-pā.iyāñ haiñ jān-o-dil bhī chuur haiñ saaqī
hamīyat ke kaleje meñ baḌe nāsūr haiñ saaqī

siyah halqe haiñ āñkhoñ meñ siyāhī ruḳh pe bikhrī hai
vufūr-e-dard se ghar meñ sabhī lañgūr haiñ saaqī

āñkhoñ āñkhoñ meñ pilā dī mire saaqī ne mujhe
ḳhauf-e-zillat hai na andesha-e-rusvā.ī hai