Tags-Saqi

saaqī kī chashm-e-mast pe ilzām aa na jaa.e
labrez sab ayāġh haiñ merī nigāh se

ab ke to mujh pe is tarah saaqī huā hai mehrbāñ
saare dukhoñ ko chuum kar mai kā ḳhumār kar diyā

har ik zarre meñ hai innī-anallāh kī sadā saaqī
ajab mai-kash the jin kī ḳhaak meñ bhī josh-e-mastī hai

ye saaqī kī karāmat hai ki faiz-e-mai-parastī hai
ghaTā ke bhes meñ mai-ḳhāne par rahmat barastī hai

jaam uThāte hī dil umDā to bhar aa.iiñ āñkheñ
chashm-e-sāqī tirī sāġhar-shiknī yaad aa.ī

nigah-e-lutf se mahrūm huuñ ab tak saaqī
saf-e-āḳhir kī taraf bhī ik ishārā hotā

ye hai mai-kada yahāñ riñd haiñ yahāñ sab kā saaqī imaam hai
ye haram nahīñ hai ai shaiḳh jī yahāñ pārsā.ī harām hai

daur-e-sāġhar meñ nahīñ kaf sar-e-bāda saaqī
duḳht-e-raz shaiḳh kī dastār liye phirtī hai

zarā samajhne de saaqī ye mājrā kyā hai
ki jaam piine se pahle ḳhumār hone lagā

saaqī kabhī mil jaa.e mohabbat kā samar bhī
in āñkhoñ kā sadqa koī sāġhar to idhar bhī

'sabā' mai hai na saaqī hai na sāġhar
ye din bhī dekhiye mai-ḳhvār ho kar

dil ko sarmast kar hī detī hai
yād-e-sāqī-o-jām are tauba

bāda-kashoñ ne paa.ī hai me.arāj-e-āshiqī
saaqī ye terī mast nazar kā kamāl hai

labālab shīsha-e-tahzīb-e-hāzir hai mai-e-lā se
magar saaqī ke hāthoñ meñ nahīñ paimāna-e-illā

bahut dekhe haiñ maiñ ne mashriq o maġhrib ke mai-ḳhāne
yahāñ saaqī nahīñ paidā vahāñ be-zauq hai sahbā

shikast aatī hai is meñ mauj-e-mai se dekhiyo saaqī
bachānā Thes se shīsha mire dil kā habābī hai

piine kā salīqa kuchh bhī nahīñ is par hai ye ḳhvāhish rindoñ kī
jis jaam pe haq hai saaqī kā hāthoñ meñ vahī jaam aa jaa.e

mai-ḳhāna salāmat rah jaa.e is kī to kisī ko fikr nahīñ
mai-ḳhvār haiñ bas is ḳhvāhish meñ saaqī pe kuchh ilzām aa jaa.e

irādat kā bharam khul jā.egā bai.at na le saaqī
giraftār-e-salāsil huuñ tavāf-e-jām kyā hogā

shīsha-e-mai kī tarah ai saaqī
chheḌ mat ham ko bhare baiThe haiñ