Tags-Saqi

tū mirī raat ko mahtāb se mahrūm na rakh
tire paimāne meñ hai māh-e-tamām ai saaqī

lā phir ik baar vahī baada o jaam ai saaqī
haath aa jaa.e mujhe merā maqām ai saaqī

bazm-e-hastī meñ hañgāma barpā kiye koī giitā liye koī qur.āñ liye
maiñ bhī saaqī ke hāthoñ se paa.ī thī jo le ke apnī sunahrī kitāb aa gayā

miTā diyā mire saaqī ne ālam-e-man-o-tū
pilā ke mujh ko mai-e-la-ilāha-illa-hū

na mai na sher na saaqī na shor-e-chañg-o-rabāb
sukūt-e-koh o lab-e-jū va lāla-e-ḳhud-rū

mausam-e-gul kā vāsta abr-e-bahār kī qasam
jab tak girūñ na jhuum kar saaqī mujhe pilā.e jā

daur-e-sāqī meñ kise gardish nahīñ
shīsha ho sāġhar ho yā paimāna ho

ab gardish-e-daurāñ ko le aate haiñ qaabū meñ
ham daur chalāte haiñ saaqī se kaho mai lā

un ko āñkheñ dikhā de Tuk saaqī
chāhte haiñ jo baar baar sharāb

saaqī hai garche be-shumār sharāb
nahīñ ḳhush-tar sivā.e yaar sharāb

kabhī Takrā diye shīshe kabhī chhalkā diye jaam
rā.egāñ ek bhī saaqī kā ishārā na gayā

vo bhī vaqt aatā hai saaqī bhī badal jaate haiñ
mai-kade par kabhī mastoñ kā ijārā na gayā

jahāñ meñ ab koī sūrat pa.e-savāb nahīñ
vo mai-kade nahīñ saaqī nahīñ sharāb nahīñ

de ke sāġhar mujhe kis lutf se saaqī ne kahā
dekhte jaao abhī ham tumheñ kyā dete haiñ

farsh kā qissa jiyūñ jiyūñ pahuñchā baam pe saaqī jhuum uThā
kis ne naqsha aisā badlā duniyā ke mai-ḳhānoñ kā

nashsha-e-dard kho gayā sāqi-e-dard so gayā
mahfil-e-dil meñ jaa.eñ kyā tishna-labī kā daur hai

shāmil-e-daur hoñ aġhyār sitam hai saaqī
apne paimāne se baḌhne de na paimāne ko

haath meñ aate hī kyā paañv nikāle saaqī
āfrīñ hai tire chalte hue paimāne ko

mere saaqī sā kahāñ koī pilāne vaalā
āñkheñ kahtī haiñ luTā dījiye mai-ḳhāne ko

koī aisī bhī hai sūrat tire sadqe saaqī
rakh luuñ maiñ dil meñ uThā kar tire mai-ḳhāne ko