Tags-Saqi

saaqī kī chashm-e-mast kā aalam na pūchhiye
ik ik nigāh hai ka.ī aalam liye hue

baat jis kī thī ga.ī saaqī vo us ke dam ke saath
jām-e-jam ho bhī to kyā jab ham nahīñ to kuchh nahīñ

az-bas-ki hai āñkhoñ meñ ḳhumār us ghaḌī saaqī
mai māñge hai tujh se jo har ahbāb kī gardish

jām-e-kausar dast-e-sāqī meñ nazar aayā mujhe
uTh gayā āñkhoñ kā parda abr-e-rahmat dekh kar

na saaqī hai na miinā hai na bar meñ yār-e-jānī hai
haqīqat meñ nahīñ jiite ba-sūrat zindagānī hai

diyā hukm saaqī ko pīr-e-muġhāñ ne
pai-e-muhtasib jām-o-mīnā uThā lā

rindoñ ko na ab Tāloñ kal par rindoñ se na kal kī baat karo
tum aaj hamāre saaqī ho tum aaj na halkī baat karo

mai bhī hai miinā bhī hai sāġhar bhī hai saaqī nahīñ
dil meñ aatā hai lagā deñ aag mai-ḳhāne ko ham

duur se aa.e the saaqī sun ke mai-ḳhāne ko ham
bas taraste hī chale afsos paimāne ko ham

pā-e-sāqī tak jabīn-e-shauq ko pahuñchā diyā
tere mamnūn-e-karam haiñ laġhzish-e-mastāna ham

ye balā dhuāñ nasha hai mujhe is ghaḌī to saaqī
ki nazar paḌe hai saarā dar-o-sahn-o-bām ulTā

mujhe chheḌne ko saaqī ne diyā jo jaam ulTā
to kiyā bahak ke maiñ ne use ik salām ulTā

khiñchne vaalī kī jhalak dekhī hai jab se saaqī
dekhnā muñh mujhe añgūr ke har daane kā

maiñ aur bazm-e-mai se yuuñ tishna-kām aa.uuñ
gar maiñ ne kī thī tauba saaqī ko kyā huā thā

saaqī tire mai-kade meñ aa kar
insān zarā sambhal gayā hai

kausar se bhar ke saaqī ne bhejā thā ham ko jo
mashkīza-e-sharāb farishte se kho gayā

jab tak daur-e-jām chalegā
saaqī terā naam chalegā

piine vaalā ho gar to saaqī kī
har nazar daur-e-jām hotī hai

de subūhī jald saaqī ab nahīñ māh-e-siyām
be-sabab kyuuñ raah dekheñ shaam kī mai-ḳhvār-e-sub.h

tishna hai mirā jaam to kuchh ġham nahīñ saaqī
ye ġham hai ki rindoñ ke bharam TuuT rahe haiñ