Tags-Sarhad

sarhad-e-jāñ talak qalam-rau dil
is se aage nizām dard kā hai

muntazir hai zarre zarre kī nigāhoñ meñ lahū
surḳh-rū hone kī sarhad meñ kahīñ rahtā hai vo

jaise do mulkoñ ko ik sarhad alag kartī huī
vaqt ne ḳhat aisā khīñchā mere us ke darmiyāñ

maqām-e-insāñ maqām-e-yazdāñ meñ fāsla hai bas ik qadam kā
jahāñ malegī ḳhudī kī sarhad vahīñ had-e-be-ḳhudī milegī

husn vo shai hai ki jis kī koī sarhad hī nahīñ
vaqt be-ma.anī hai aur fāsla ik dhoka hai

kisī ke bujhte dil kī hai nishānī
charāġh-e-sarhad-e-manzil meñ kyā hai

falak had hai ki sarhad hai zamīñ ma.adan hai yā madfan
mujhe bechain hī rakhte haiñ ye vahm o yaqīñ mere

sukūñ kī shakl ho paidā koī to kaise ho
yaqīñ hai sarhad-e-jāñ se pare gumāñ ghar meñ

manzil fanā-e-zauq-e-talab kā maqām thī
achchhā huā maiñ sarhad-e-manzil meñ rah gayā

jism ko ruuh kī sarhad pe bulā kar dekheñ
kyuuñ na ā.īne ke andar kabhī jā kar dekheñ

charāġh sajda jalā ke dekho hai but-kada dafn zer-e-ka.aba
hudūd-e-islām hī ke andar ye sarhad-e-kāfirī milegī

niind aa ga.ī thī manzil-e-irfāñ se guzar ke
chauñke haiñ ham ab sarhad-e-isyāñ se guzar ke

naġhma-zan sahrā meñ ho jis tarah koī andalīb
yuuñ hai ai 'mahrūm' sarhad meñ ġhazal-ḳhvānī mirī

diloñ ke beach na dīvār hai na sarhad hai
dikhā.ī dete haiñ sab fāsle nazar ke mujhe

in havāoñ ke tevar baḌe saḳht haiñ
dekh sarhad kidhar jā.egī zindagī

āfāq kī sarhad par saa.e se gurezāñ haiñ
in soḳhta-jānoñ ko us paar na thā jaanā

bam gharoñ par gireñ ki sarhad par
rūh-e-ta.amīr zaḳhm khātī hai

muhīb rāste sarhad kī samt jaate hue
zarā sā aur chale ham to vo suhāne lage

raat kī sarhad yaqīnan aa ga.ī
jism se saayā judā hone lagā

rañgīnī-e-jamāl kī sarhad na thī koī
aur hausla bhī hīta-e-imkāñ se kam na thā