Tags-Sarhad

mālūm nahīñ phir vo kahāñ chhup gayā 'ādil'
saaya sā koī lams kī sarhad pe milā thā

sher kaheñ to aql-o-junūñ kī sarhad par ruk kar
lafzoñ meñ jazboñ ke nagoñ ko jaḌnā paḌtā hai

shahr-e-maftūha dekh hasrat se
tujh ko sarhad se dekhtī huuñ maiñ

mujhe takmīl kī sarhad pe lā ke rā.egānī kī bashārat dī ga.ī hai
maiñ jo reza reza malba bantī ābādī kā nauha-ḳhvāñ huuñ

is baar dil ke raste hamla karegī duniyā
sarhad banā rahā huuñ faulād ho rahā huuñ

sarhad-e-fanā tak bhī tīrgī nahīñ aa.ī
yuuñ bhī raas añdheroñ kī zindagī nahīñ aa.ī

ye shahar to sahrāoñ kī sarhad pe basā thā
kaise ye ḳharāba kaf-e-sailāb meñ aayā

jalne vaalo tā-ba-imkāñ zabt soz-e-ġham karo
aag jab bhaḌke charāġh-e-sarhad-e-manzil bano

intihā-e-ishq ho yuuñ ishq meñ kāmil bano
ḳhaak ho kar bhī nishān-e-sarhad-e-manzil bano

vahshat meñ nikal jā.ūñ maiñ sarhad se zamīñ kī
is gumbad-e-gardāñ kā vale dar nahīñ miltā

bhuul jā ḳhud ko ki hai ma.arifat-e-nafs yahī
koī rahtā hī nahīñ sarhad-e-irfāñ ke qarīb

nazar uThā ke jo dekhā udhar koī bhī na thā
sulagtī dhuup kī sarhad pe ghar koī bhī na thā

tere harīm-e-nāz kī us ko ḳhabar ho kyā
jo sarhad-e-ḳhayāl se aage gayā nahīñ

dasht-e-hastī meñ bahut ābla-pā.ī hai 'nadīm'
sarhad-e-marg-e-musalsal to aziyyat hai miyāñ

ye mumkin hai vo un ko maut kī sarhad pe le jaa.eñ
parindoñ ko magar apne paroñ se Dar nahīñ lagtā

to phir yaqīn kī sarhad meñ vaar kar mujh par
gumāñ kī dhund meñ jab tiir uchaTne vaalā hai

koī to sarhad-e-ḳhāmosh toḌ saktā thā
sukūt-e-shām yahāñ tah-ba-tah utartī hai

paḌhiye un ko kisī kāġhaz pe nahīñ sarhad par
apne ḳhuuñ se jo shahādat kī ġhazal likhte haiñ

maut aur zindagī kī sarhad par
vo kisī se nahīñ mile lekin

aa ga.ī ai mire saa.e se bhī bachne vaalī
rafta rafta tire iqrār kī sarhad ki nahīñ