Tags-Sarhad

hai par-e-sarhad-e-idrāk se apnā masjūd
qible ko ahl-e-nazar qibla-numā kahte haiñ

tumhārī shā.irāna be-ḳhudī ko
kisī sarhad pe koī roktā na.iiñ

is ghane jañgal kā jalnā apnī sarhad se nikalnā
bastiyoñ ko yaad hai sab kuchh dhuāñ hote hue bhī

jañg meñ parvar-digār-e-shab kā kyā qissā huā
lashkar-e-shab sub.h kī sarhad pe kyuuñ paspā huā

apne hī gaañv kī sarhad par pahuñch kar aaj ham
pūchhte haiñ ham-safar! ye kaun bastī aa ga.ī

tirī manzil pe pahuñchnā koī āsān na thā
sarhad-e-aql se guzre to yahāñ tak pahuñche

baad meñ rakhe sarāboñ ke dayāroñ meñ qadam
pahle vo saañs kī sarhad pe to aa kar dekhe

lamha lamha hai ki hai qāfila-e-manzil-e-nūr
sarhad-e-shab meñ bhī farmān-e-sahar hai jaarī

sarhadeñ achchhī ki sarhad pe na ruknā achchhā
sochiye aadmī achchhā ki parinda achchhā

sarhad-e-ishq se aage na baḌhī vahshat-e-ishq
husn-e-hushyār ko dīvāna banāyā na gayā

talab us kī hai ki jo sarhad-e-imkāñ meñ nahīñ
merī har raah meñ haa.il hai bayābāñ apnā

jo gayā lauT ke aayā hī nahīñ sarhad se
ab kise dasht meñ āvāz lagātī hai havā

ai be-qarāri-e-dil mujh ko ye ḳhabar hī na thī
ki jo qarār kī sarhad hai ittiqā tak hai

ek ho jaa.e na jab tak sarhad-e-hosh-o-junūñ
ek ho kar chāk-e-dāmān-o-garebāñ kuchh nahīñ

aap kī ḳhushiyoñ kī sarhad se duur hamāre Dere haiñ
DhūñDeñge kuchh log hameñ bhī aap ke in afsānoñ meñ

chilla-e-jāñ par chaḌhā kar āḳhirī sāñsoñ ke tiir
maut kī sarhad meñ dāḳhil zindagānī ho ga.ī

raushnī kī koī sarhad nahīñ
koī maz.hab nahīñ

tum to ḳhat meñ likh detī ho ghar meñ jī ghabrātā hai
tum kyā jaano kyā hotā hai haal hamārā sarhad par

jis kī bāteñ ammāñ abbū aksar karte rahte haiñ
sarhad paar na jaane kaisā vo hogā purkhoñ kā ghar

maiñ chāhtā huuñ badal duuñ 'manzar' purāne naqsh o nigār saare
ki sarhad-e-jism-o-jāñ se aage nayā koī iztirāb dekhūñ