Tags-Sawal

qarīna sarqa ishāra kināya ramz savāl
hayā se jhuktī nigāhoñ meñ jhāñkte the sabhī

ye to nahīñ ki ab ke vo mutlaq vahāñ na thā
lekin savāl-e-vasl ye kahne ko haañ na thā

dam-e-hashr azal kī bhī yaad kar ye zabān kyā ye nigāh kyā
jo kisī se aaj na ho sakā vo savāl bār-e-digar bhī hai

ġhāsiboñ se baḌh ke jab kartā hai haq apnā savāl
jab nazar aatā hai mazlūmoñ ke chehroñ par jalāl

safīna garche kināre pe jā lagā lekin
savāl ye hai idhar Thahrā yā udhar Thahrā

use itnā sochā hai roz o shab ki savāl-e-dīd rahā na ab
vo galī bhī zer-e-tavāf hai jahāñ ek baar nahīñ gayā

faqīh-e-shahr kī har baat maan lo chup-chāp
agar savāl uThāyā, to zindagī se ga.e

bijlī girā.eñ tuur par āvāz hī se vo
Thahre kabhī to ham se savāl-o-javāb kī

chiḌte haiñ vo savāl se ye ham samajh ga.e
hai is liye unheñ dil be-mudda.ā pasand

vo ḳhayāl khol ke dekhnā vo savāl taul ke dekhnā
ki samajh rahe ho jise ḳhafā vo ḳhafā na ho kahīñ yuuñ na ho

vasl kī iltijā pe bigḌe kyuuñ
sun ke chup ho raho savāl kā kyā

ek savāl ne jab se mujh ko pahnā hai
sharminda haiñ saare rañg javāboñ ke

javāb dene ko jī chāhtā nahīñ us ko
savāl vaise baḌī ājizī se kartā hai

binā dekhe gavāhī māñgtā hai
savāl apnā judā rakkhā hai us ne

savāl-e-vahshat-e-jāñ ke javāb āhista āhista
but-e-kāfir uThāte haiñ naqāb āhista āhista

lamhoñ ke savāl se gurezāñ
sadiyoñ kā javāb likh rahā huuñ

havā kuchh apne savāl tahrīr dekhtī hai
ki bādaloñ ko bhī misl-e-zanjīr dekhtī hai

shab-e-vasl dekh ke ḳhvāb meñ maiñ paḌā thā saḳht azaab meñ
the hazār soch javāb meñ ajab us kā mujh se savāl thā

maiñ ne bhī chalte chalte yūñhī kar diyā savāl
kyā ho gayā jo aap ne puurā nahīñ kiyā

tamām mahfil ke rū-ba-rū go uThā.īñ nazreñ milā.īñ āñkheñ
samajh sakā ek bhī na lekin savāl merā javāb terā