Tags-Sawal

maiñ apne aap se jab jab savāl kartā huuñ
mire javāb meñ tāsīr chāhtā hai dil

hamārī aabrū kā hai savāl ab sab se mat kahnā
vo bāteñ ham ne jo tum se abhī khul kar kahīñ baabā

har ek ḳhvāb so gayā ḳhayāl jāgte rahe
javāb pī liye magar savāl jāgte rahe

ye aadmī haiñ ki patthar javāb dete nahīñ
chale haiñ koh-e-nidā se savāl dekhne ko

us chheḌ ke nisār ki sun kar savāl-e-vasl
ā.īna rakh diyā mire aage javāb meñ

karne to do savāl kareñ haiñ to kyā
āshiq huuñ maiñ bhī ik but-e-ḳhāna-ḳharāb kā

qadam qadam pe vahī tamkanat kā ek savāl
hai koī dūsrā ham sā savād-e-gañgā meñ

koī javāb na sūraj meñ thā na chāñd ke paas
mire savāl sar-e-āsmāñ chamak rahe the

ye ahl-e-husn kī fitrat ajiib fitrat hai
savāl karne se pahle javāb chāhte haiñ

muddatoñ se ḳhalish jo thī jaise vo kam sī ho chalī
aaj mire savāl kā mil hī gayā javāb kyā

dam-e-takallum kisī ke aage ham apne dil ko bhī dete hauke
milāte chun chun ke lafz aise savāl goyā javāb hotā

āmādgī ko vasl se mashrūt mat samajh
ye dekh is savāl pe sanjīda kaun hai

mujhe apne zaḳhm kī ḳhud bhī koī ḳhabar nahīñ
so na mujh se koī savāl kar mire chāra-gar

javāb sochtī rahtī huuñ maiñ ka.ī din tak
vo ik savāl havā meñ uchhāl detā hai

maiñ pūchhtā huuñ hazāroñ savāl us se magar
javāb meñ faqat ādāb likkhā jaatā hai

kuchh na deñge to kyā ziyāñ hogā
harj kyā hai savāl kar chaliye

go jītnā hamārī baqā kā savāl thā
lekin bisāt-e-vaqt ne mohara badal diyā

ḳhud apnī fikr ugātī hai vahm ke kāñTe
ulajh ulajh ke mirā har savāl Thahrā hai

maiñ kahūñgā harf-e-talab kuchh aise kamāl se
mirā dard mere savāl meñ nahīñ aa.egā

din meñ bhī ghar ujāle se mahrūm hai to hai
kirnoñ kā kyā savāl karūñ āftāb se