Tags-Sawal

ammī javāb dījiye mere savāl kā
aatā nahīñ samajh meñ ki ye kyā hai mājrā

ek ham hī to nahīñ haiñ jo uThāte haiñ savāl
jitne haiñ ḳhāk-basar shahr ke sab pūchhte haiñ

jur.at-e-afzā-e-savāl ai zahe andāz-e-javāb
aatī jaatī hai ab us but kī nahīñ haañ ke qarīb

har ek shaḳhs samajh kar bhī ho gayā ḳhāmosh
azal se chehre pe ham vo savāl le aa.e

mujhe vahsh-o-tair se rashk hai ki kabhī unhoñ ko kisī namat
na savāl hai na javāb hai na azaab hai na iqaab hai

unheñ kahne sunñe se bair hai jo ḳhud aa.eñ so to ba-ḳhair hai
ye ġharaz ki zor hī sair hai na savāl hai na javāb hai

kabhī usuul kī ġhairat kabhī ziyāñ kā savāl
dimāġh-o-dil meñ rahī hai mushāvrat kyā kyā

dekheñ 'mohsin' javāb kyā aa.e
un ke aage savāl rakkhā hai

tire javāb kī ummīd jaañ se bāñdhe hue
mirā savāl havā meñ kahīñ bikhar chukā hai

aa.egā phir koī javāb us kā
to fazā meñ koī savāl uchhāl

har roz sochtā huuñ na.e taur se tumheñ
mere liye tum ek anokhā savāl ho

sadiyoñ se kuchh vazāhateñ yuuñ kar rahā hai zehn
jaise ki ās-pās kī har shai savāl ho

vo merī ḳhāmushī ko baḌhātā hai hashr se
rakhtā hai laaj mere lab-e-be-savāl kī

savāl ek nazar kā hai rad na kar ai dost
gadā-e-ḳhāk-basar rāh-e-iltifāt meñ huuñ

merī āñkheñ savāl kartī haiñ
kyā ḳhudā manzaroñ meñ rahtā hai

isī javāb ke raste savāl aate haiñ
isī savāl meñ saarā javāb Thahrā hai

vo ek Dūbtī āvāz-e-bāz-gasht ki aa
savāl maiñ ne kiyā thā javāb maiñ ne diyā

kisī savāl kī sūrat hai kā.enāt tamām
aur is savāl kā āsān sā javāb hai ishq

tumhārī āñkhoñ meñ chhalkīñ nadāmateñ kaise
javāb banñe lagā kyā savāl kyā us kā

be-hisī kī duniyā se do savāl mere bhī
kab talak jiyā jaa.e aur kyoñ jiyā jaa.e