Tags-Sawal

maiñ anāoñ kā thā parvarda to phir dast-e-savāl
kis tarah phailā kisī ke sāmne hairat meñ huuñ

barā.e dād-e-suḳhan kāsa-e-savāl ho dil
ḳhudā bachā.e 'jamīl' is gadāgarī se mujhe

har aañkh ik savāl tahī-dast ke liye
kab tak marūñgā mere ḳhudā baar baar maiñ

ham se rukhā.iyāñ aur muñh jhulse mudda.ī kā
bosa pe bosa har dam duuñ be-savāl denā

is umr bhar meñ tujh se māñgā hai ek bosa
ḳhālī paḌe na pyāre merā savāl denā

daar par chaḌh gayā 'ayāz' magar
kis ne pūchhā savāl kis kā thā

tujhe apnā samajh ke māñgā hai
har kisī se savāl thoḌī hai

rukī huī huuñ ik aaise savāl par 'shabnam'
javāb jis kā hamesha muhāl hotā hai

laboñ pe mohr-e-ḳhamoshī lagā.ī jaatī hai
aur is ke ba.ad hamīñ se savāl hotā hai

ġhair jab vasl kā kartā hai savāl un se to ve
kaise mahjūb ho dam khā ke chale aate haiñ

tumhārī nazroñ kī ye tapish hai ki mere lafzoñ pe aable haiñ
savāl saare jhulas ga.e haiñ javāb saare jhulas ga.e haiñ

ka.ī savāl machalte haiñ har savāl ke ba.ad
shab-e-visāl se pahle shab-e-visāl ke ba.ad

koī hai 'rūmī' musalsal savāl kartā hai
mire savāl se pahle mire savāl ke ba.ad

tirī qasam tirā chehra hī rū-ba-rū thā mire
tire savāl se pahle tire savāl ke ba.ad

baḳhshish pe do jahāñ ke aa.ī thī himmat-e-dahr
lekin na yaañ zabāñ tak harf-e-savāl aayā

mile to itnī ri.āyat atā kare mujh ko
mire javāb ko sun kar koī savāl kare

koī sune na sune arz-e-hāl kartā jā
na ruk javāb kī ḳhātir savāl kartā jā

savāl kar ke maiñ ḳhud hī bahut pashemāñ huuñ
javāb de ke mujhe aur sharmsār na kar

chhoḌ bhī dete mohtasib ham to ye shaġhl-e-mai-kashī
zid kā savāl hai to phir jā isī baat par nahīñ

kal mire ham-zād ne mujh se kiyā dilkash savāl
kis ko detā huuñ sadā.eñ raat bhar sote hue