Tags-Sawal

ban gayā logoñ kī shān-e-kaj-kulāhī kā savāl
apne sar ko lā.eq-e-dastār kar lenā mirā

thā diloñ kā ye bhī ik imtihāñ ki takallufāt the darmiyāñ
mujhe Dar thā us ke javāb kā use fikr mere savāl kī

ġhāsiboñ se baḌh ke jab kartā hai haq apnā savāl
jab nazar aatā hai mazlūmoñ ke chehroñ par jalāl

uThtā hai jab tabāhī-e-dil kā kabhī savāl
aa aa ke Thahar jaatā hai lab par tumhārā naam

un se koī javāb ban na paḌā
merā tarz-e-savāl kyā kahiye

ġham-e-hayāt o ġham-e-dil bahut sahī lekin
koī savāl kiyā hai abhī ghaTāoñ ne

ye sazā-o-jazā kī baat na thī
Dar savāl-o-javāb kā bhī thā

maiñ jis kā javāb na de pā.ūñ
aisā bhī koī savāl karnā

ḳhushbū se kis zabān meñ bāteñ kareñge log
mahfil meñ ye savāl tujhe dekh kar huā

ab tire savāl kā kyā javāb duuñ bhalā
baat ye hai muḳhtasar dil bahut udaas hai

vo ik savāl-e-tamannā jo baar baar huā
us ik savāl kā koī javāb hai ki nahīñ

mile ik aah kā vaqfa to vaqt-e-purshish-e-hāl
har ik savāl kā apne javāb letā jā

apne savāl sahl na lagne lageñ use
aate bhī hoñ javāb to far-far na dījiyo

phir se bujhne lagī hai bīnā.ī
phir tirī diid kā savāl huā

ḳhayāl jis kā thā mujhe ḳhayāl meñ milā mujhe
savāl kā javāb bhī savāl meñ milā mujhe

uThāyā hashr meñ bhī mujh ko us ne
savāl-e-dīd kā saa.il banā kar

bas ek sukūt hī jis kā javāb honā thā
vahī savāl miyāñ baar baar kyā karte

havas hai har ek jī kī jī meñ hue jo ġhash vasl kī ḳhushī meñ
tamām shab guzrī be-ḳhudī meñ javāb kaisā savāl kaisā

tujhe pasand kahāñ haal pūchhnā merā
tirī nigāh meñ lekin savāl sā kyā hai

ye kā.enāt sarāpā javāb hai jis kā
vo ik savāl hai phir bhī savāl se bāhar