Tags-Sawal

zabān apnī badalne pe koī raazī nahīñ
vahī javāb hai us kā vahī savāl mirā

bole vo kuchh aisī be-ruḳhī se
dil hī meñ rahā savāl apnā

kabhī kabhī to ye dil meñ savāl uThtā hai
ki is judā.ī meñ kyā us ne pā liyā hogā

savāl kar diyā tishna-labī ne sāġhar se
mirī talab se tirā itnā fāsla kyuuñ hai

uThā ke dar se sar-e-rah biThā diyā hai mujhe
mire savāl se pāgal banā diyā hai mujhe

pahle to shahr bhar meñ misāl aa.ine hue
phir gard se sarāpā savāl aa.ine hue

bose kā kyā savāl lekin
us muñh se javāb kuchh na niklā

vo nīchī nazreñ thiiñ dil kī tālib vafā ne go jaan nazr kar dī
magar asar jo savāl meñ thā javāb meñ vo asar nahīñ hai

savāl pūchhne lage haiñ rāste
safar pe kyuuñ nikal nahīñ rahā huuñ maiñ

jahāñ tak hai dair o haram kā savāl
raheñ chup to mushkil kaheñ to muhāl

hai tirā gaal maal bose kā
kyuuñ na kiije savāl bose kā

ajiib turfa-tamāshā hai mere ahd ke log
savāl karne se pahle javāb māñgte haiñ

kuchh din se intizār-e-savāl-e-digar meñ hai
vo muzmahil hayā jo kisī kī nazar meñ hai

ye kis hisāb meñ jhelī hai maiñ ne dar-ba-darī
tire savāl-e-badan par javāb raushan thā

tālib koī hai ek karam kī nigāh kā
kiije na rad kisī kā ye pahlā savāl hai

purāne daur meñ rahtā thā ik kisān aisā
jo baat baat pe sab se savāl kartā thā

kitāb-e-umr meñ ik vo bhī baab hotā hai
har ik savāl jahāñ lā-javāb hotā hai

laboñ se harf-e-mohabbat adā nahīñ hotā
nazar nazar se savāl-o-javāb hotā hai

tirī nigāh samajhtī hai yā nahīñ dekhūñ
lab-e-ḳhamosh meñ koī savāl pinhāñ hai

qarīna sarqa ishāra kināya ramz savāl
hayā se jhuktī nigāhoñ meñ jhāñkte the sabhī