Tags-Sawal

dil kī aarzū thī dard dard-e-be-davā paayā
kyā savāl thā merā aur kyā javāb un kā

udaas āñkheñ ġhazāl āñkheñ
javāb āñkheñ savāl āñkheñ

kabhī kabhī to ye dil meñ savāl uThtā hai
ki is judā.ī meñ kyā us ne pā liyā hogā

vo bhīgā chehra sabhoñ se haT kar savāl pūchhe
hamārī āñkhoñ kī aag hogī na kam kisī din

vo jā rahā ho to vāpsī ke tamām imkān jaan lenā
jo lauT aa.e to kaise guzrī ye us se pahlā savāl rakhnā

savāl ye hai havā aa.ī kis ishāre par
charāġh kis ke bujhe ye savāl thoḌī hai

agar kahūñ maiñ sañvāro zulfeñ to vo bigaḌte haiñ de ke gaalī
ajab nasīboñ kī kuchh hai shāmat savāl dīgar javāb dīgar

maiñ apne matlab kī kah rahā huuñ vo ā.ina-rū ik aib meñ hai
bhalā ho milne kī ḳhaak sūrat savāl dīgar javāb dīgar

kalām tujh se hai aur apnā suḳhan ko ham tere kyūñki jāneñ
zarā ye khultī nahīñ haqīqat savāl dīgar javāb dīgar

talab meñ bose kī kyā hai hujjat savāl dīgar javāb dīgar
samajh ke kah baat be-muravvat savāl dīgar javāb dīgar

kahā jo maiñ ne ki do mirā dil to bole hañs kar kidhar hai dilī
kahūñ to kyā aur un ko rahmat savāl dīgar javāb dīgar

mirā to paiġhām vasl kā hai tumhārī taqrīr hijr kī hai
butāñ hai ye bhī ḳhudā kī qudrat savāl dīgar javāb dīgar

zabān apnī badalne pe koī raazī nahīñ
vahī javāb hai us kā vahī savāl mirā

ek hī thā javāb husn ke paas
husn se jis ne bhī savāl kiyā

raat ko ḳhvāb ho ga.ī din ko ḳhayāl ho ga.ī
apne liye to zindagī ek savāl ho ga.ī

savāl phuul se nāzuk javāb zaḳhmoñ ke
bahut ajiib haiñ ye inqalāb zaḳhmoñ ke

har ibārat savāl jaisī hai
lafz ġhā.eb haiñ darmiyān se kuchh

ḳhudā javāb de na de bigaḌ paḌe
ḳhudā se bhī savāl kar visāl kar

tahrīr jo kiyā thā hamāre savāl par
yazdāñ kā vo javāb farishte se kho gayā

tirī taraf se javāb aa.e na aa.e parvā nahīñ hai is kī
yahī bahut hai ki ham ko yārab tū sirf izn-e-savāl de de