Tags-Sawal

savāl shukr-o-shikāyat kā ab rahā hī nahīñ
vo kaj-shi.ār mirī samt dekhtā hī nahīñ

sabhī guftugū kā ma.aal hai na savāl kar na javāb de
yahāñ shor-o-ġhul ke bahāv meñ jise chup lagī vo amar rahā

mire savāl-e-visāl par tum nazar jhukā kar khaḌe hue ho
tumhīñ batāo ye baat kyā hai savāl puurā javāb aadhā

vo lajā.e mere savāl par ki uThā sake na jhukā ke sar
uḌī zulf chehre pe is tarah ki shaboñ ke raaz machal ga.e

basān-e-dast-e-savāl saa.il tahī hoñ har ek mudda.ā se
niyāz hai be-niyāziyoñ se baġhal meñ dil sūrat-e-sanam hai

jur.at-e-arz-e-tamannā kā sabab vo ḳhud hue
mehrbāñ dekhā unheñ lab par savāl aa hī gayā

kahā thā tum ne ki laatā hai kaun ishq kī taab
so ham javāb tumhāre savāl hī ke to haiñ

ik ek harf kī rakhnī hai aabrū mujh ko
savāl dil kā nahīñ hai mirī zabān kā hai

savāl karne ke hausle se javāb dene ke faisle tak
jo vaqfa-e-sabr aa gayā thā usī kī lazzat meñ aa basā huuñ

lo ham na kahte the ham ko nahīñ umīd-e-javāb
lo ham ne dekh liyā hai savāl kar ke bhī

savāl zehn meñ chubhte haiñ nashtaroñ kī tarah
ye ḳhuun bhī mujhe hotā dikhā.ī detā hai

jāgne kā savāl hī na rahā
aaj kī raat niiñd kyā aa.ī

mohabbat pe shāyad zavāl aa rahā hai
ki ab zindagī kā savāl aa rahā hai

har ek savāl kā dete haiñ kyuuñ javāb ġhalat
paḌhā hai bachchoñ ne shāyad sabhī nisāb ġhalat

gadā nahīñ haiñ ki dast-e-savāl phailā.eñ
kabhī na aap ne pūchhā ki aarzū kyā hai

mizāj haavī rahā hamesha zarūratoñ par
faqīr harf-e-savāl se āshnā nahīñ hai

vo sho.ala-e-savāl ki duniyā ujaal de
dil ke charāġh meñ to muqaffal na kar use

lab suukh kyuuñ na jaa.eñ galā baiTh kyuuñ na jaa.e
dil meñ haiñ jo savāl uThāte raheñge ham

majāl de ke mujhe ḳhāmushī vabāl huī
mirā javāb vidā-e-savāl meñ na milā

tirī justujū mirī gumrahī tirī intihā mirī ibtidā
tirī ziist terā javāb hai mirī ziist merā savāl hai