Tags-Sawal

laraz rahā thā falak arz-e-hāl aisā thā
shikastagī meñ zamīñ kā savāl aisā thā

ham ālam-e-ḳhvāb meñ haiñ yā ham haiñ ḳhvāb
ham ḳhud vasā.el haiñ ḳhud savāl aur javāb

aap apnī galī ke saa.il ko
kam se kam par savāl to rakhiye

har aadmī ke lab pe hai ik dil-shikan savāl
āḳhir kahāñ chale ga.e vo dil-pazīr log

hai usī se ruuh meñ tāzgī yahī qalb-o-jāñ kī hai raushnī
tū ḳhudā-rā tark-e-sitam na kar mirī zindagī kā savāl hai

savāl ye hai ki phir aag lag ga.ī kaise
koī diyā to añdhere makāñ meñ thā hī nahīñ

aa phir se mere pyaar kī taqdīs ban 'niyāz'
aa kāñpte laboñ pe tirā hī savāl hai

chehre pe javāb chāhtā huuñ
āñkhoñ se savāl kar rahā huuñ

dil meñ vafā kī hai talab lab pe savāl bhī nahīñ
ham haiñ hisār-e-dard meñ us ko ḳhayāl bhī nahīñ

hai iḳhtiyār hameñ kā.enāt par hāsil
savāl ye hai ki ham kis ke iḳhtiyār meñ haiñ

savāl ghar nahīñ buniyād par uThāyā hai
hamāre paañv kī miTTī ne sar uThāyā hai

javāb aa.e na aa.e savāl uThā to sahī
phir is savāl meñ pahlū na.e savāl ke rakh

tum apne andar kī hijratoñ se niDhāl ho kar jo lauTnā to
na ḳhud se koī savāl karnā na paas apne javāb rakhnā

falak se nuur kī sūrat savāl utre the
diye zamīn ne lekin javāb miTTī ke

shal hue dast-e-talab bhuul ga.e harf-e-savāl
aaj ham hausla-e-ahl-e-karam dekhte haiñ

radd o qubūl terā haq radd-e-amal hamārā haq
ek bhī multajī nahīñ sab kī nazar savāl hai

zabān khol ke is bazm meñ ḳharāb hue
savāl ek thā lekin vazāhateñ haiñ bahut

mere ḳhvāboñ kī patañg mujh se
kartī hai an-ginat savāl

yahāñ har qadam pe savāl hai vahāñ har qadam pe malāl hai
baḌī uljhanoñ meñ hai zindagī tire gaañv meñ mire shahr meñ

duā kā dar to sabhī ke liye khulā hai magar
jise yaqīn ho is par savāl kartā hai