Tags-Sawal

tum ne uttar badal diye har baar
merā vo hī savāl hai ab bhī

chaman ke shaidā.iyoñ se ik din savāl ye pūchhnā hai mujh ko
khilā jo pur-ḳhār jañgaloñ meñ vo phuul kyuuñ mo'atabar nahīñ hai

ye merī ḳhāna-ḳharābiyoñ pe savāl uTThe
chale bhī aao ki dahr ko maiñ javāb likkhūñ

karīm jo tujhe denā hai be-talab de de
faqīr huuñ pa nahīñ ādat-e-savāl mujhe

guzar huā jo kabhī us se mil liye varna
savāl us se kujā mudda.ā bhī koī nahīñ

vasl ke badle meñ kyā dāġh-e-sitāra māñgnā
is shab-e-be-ḳhānamāñ se kar savāl us ke liye

sab ḳhayāl us ke liye haiñ sab savāl us ke liye
rakh diyā ham ne hisāb-e-māh-o-sāl us ke liye

gar pūchhnā hī hai to zamāne kā haal pūchh
baare paḌosiyoñ ke na ham se savāl kar

chiḌte haiñ vo savāl se ye ham samajh ga.e
hai is liye unheñ dil be-mudda.ā pasand

kabhī ibādat kabhī ināyat kabhī duā.eñ kabhī atā.eñ
kahīñ pe dast-e-talab bane ham kahīñ pe ham tak savāl aayā

jo bhiik māñgte hue bachche ke paas thā
us kāsa-e-savāl ne sone nahīñ diyā

savāl kartī hai umr-e-ravāñ ki hai koī
jo merī tezī-e-raftār chhīn le mujh se

zabāñ ho band zabāñ se agar savāl karūñ
qalam hoñ haath agar mudda.ā-nigār huuñ maiñ

kasī se matlab-e-dil merā hal nahīñ hotā
savāl-e-mas.ala-e-jabr-o-iḳhtiyār huuñ maiñ

savāl kyā karūñ tujh se gunāhgār huuñ maiñ
nigāh chaar ho kyūñ-kar ki sharmsār huuñ maiñ

kartā hai har savāl ye hujjat kī mashq vo
koī javāb hī nahīñ kyūñkar kahe baġhair

tamām mahfil ke rū-ba-rū go uThā.īñ nazreñ milā.īñ āñkheñ
samajh sakā ek bhī na lekin savāl merā javāb terā

mujh ko kaafī hai maiñ samjhūñgā use husn-e-javāb
bas vo farmā deñ ki saa.il kā savāl achchhā hai

na māñgiye jo ḳhudā se to māñgiye kis se
jo de rahā hai usī se savāl hotā hai

iz.hār-e-hāl ke liye sūrat savāl hai
hai guftugū se kaam na ham ko zabāñ se rabt