Tags-Saya

ye sāya-dār shajar to fareb dete haiñ
ḳhizāñ ke saath raho āñdhiyoñ ke ho jaao

tanz dushnām lānat adāvat hasad
in rafīqoñ kā saaya rahā aur maiñ

jab saaya bhī shīshe kī tarah TuuT gayā
dīvār ne dekhā ye tamāsha na kabhī

kal raat ga.e ain-e-tarab ke hañgām
saaya vo paḌā pusht se aa kar sar-e-jām

jis kī buniyādoñ meñ shab kā husn hai
aisī kaalī dhuup kā saaya huuñ maiñ

vo būḌhā peḌ jo thā barg-o-bār se mahrūm
ham us se lag ke jo baiThe to sāya-dār lagā

peḌ ko apnā hī saaya nahīñ miltā logo
fasl apnī kabhī paate nahīñ bone vaale

vo aañkh sāya-fagan hai dil par jo be-ḳhudī kā hai isti.āra
ghulī huī nīlgūñ samundar meñ tal.at-e-māhtāb jaise

dil vo sahrā hai jahāñ hasrat-e-sāya bhī nahīñ
dil vo duniyā hai jahāñ rañg hai ra.anā.ī hai

barsoñ kā bachhḌā huā saaya
ab aahaT le kar lauTā hai

koī saaya to milā dhuup ke zindānī ko
merī vahshat tirī chāhat ko duā detī hai

kahāñ jaa.e thakā-māñda musāfir
tū hī saaya tū hī dīvār bhī hai

maiñ huuñ yā tū hai ḳhud apne se gurezāñ jaise
mare aage koī saaya hai ḳhirāmāñ jaise

muḌ ke dekhūñ to ta.āqub meñ vahī saaya ho
bhuul jā.ūñ mire hamrāh koī ghar tak hai

mere paañv chaaT ke mere qad se bhī baḌh jaatā thā
mere saath tamāshe kitne merā saaya kartā thā

zindagī dhuup meñ jalte hue kaaTī jis ne
saaya mil jaa.e koī us ko duā dī jaa.e

sarf kartī huī jaise saa.at koī lamha koī farāmosh kartā huā
phir na jaane kahāñ TuuT kar jā girā ek saaya saroñ se guzartā huā

nazdīk kabhī ḳhuld-e-barīñ ke na raheñge
ham-sāya bhī ab ham to hasīñ ke na raheñge

vahshat meñ basar hote haiñ ayyām-e-shabāb aah
ye shām-e-javānī hai ki saaya hai hiran kā

kisī bhī samt niklūñ merā pīchhā roz hotā hai
ta.āqub meñ koī gumnām saaya roz hotā hai