Tags-Saya

ḳhizāñ kā saaya na paḌ jaa.e is gulistāñ par
uThāo parcham-e-gul ai chaman ke matvālo

shām-e-vāda kā Dhal gayā saaya
aane vaalā abhī nahīñ aayā

ruuh par jism kā labāda hai
is liye hī to sāya-dār haiñ ham

maiñ shahr ko kahtā hoñ bayābāñ ki yahāñ bhī
saaya tirī dīvār kā kab sar pe paḌā hai

aayā pal bhar ko sar pe saaya phir
dhuup ko aa gayā ḳhayāl mirā

saath mere ghasiTtā hai pal pal
thak ke saaya huā niDhāl mirā

jis ke ḳhauf se bhaag rahā thā
vo apnā hī saaya niklā

be-sāya na ho jaa.e kahīñ ghar mirā yārab
kuchh din se maiñ jhuktā ye shajar dekh rahā huuñ

us bastī pe majbūrī kā saaya thā
ghar ghar meñ bāzāroñ kī āvāzeñ thiiñ

chāñdnī rātoñ meñ ek aaseb ban kar ghūmiye
ghar kī dīvāroñ par apnā saaya be-sar dekhiye

saaya kiye hue thā jo bādal nahīñ rahā
āfāt kā ye mehr magar Dhal nahīñ rahā

kis qadar haTelā hai terā be-zabāñ saaya
jism kī tarah akasr ruuh meñ utartā hai

saaya bhī shab-e-hijr kī zulmat meñ chhupā hai
ab kis se kareñ baat samajh meñ nahīñ aatā

yahāñ taaj us ke sar par hogā jo taḌke shahr meñ dāḳhil ho
yahāñ saaya humā kā nahīñ paḌtā yahāñ koh-qāf nahīñ hotā

ba-rañg-e-sāya o ḳhurshīd ai 'bayāñ' maiñ ne
kabhū raqīb se us ko judā nahīñ dekhā

hayāt-e-ishq mujhe aaj ajnabī na samajh
ki saaya saaya tire pesh-o-pas rahā huuñ maiñ

rishta-e-āb-o-sarāb ik ḳhvāb hai
tū bhī saaya maiñ bhī saaya soch le

ai dopahar kī dhuup batā kyā javāb duuñ
dīvār pūchhtī hai ki saaya kidhar gayā

yuuñ dhuup ne ab zāviya badlā hai ki 'āsim'
saaya bhī mirā mere barābar meñ nahīñ hai

aab kī tāsīr meñ huuñ pyaas kī shiddat meñ huuñ
abr kā saaya huuñ lekin dasht kī vus.at meñ huuñ