Tags-Saya

paanī meñ chamaktā hai koī mehrbāñ saaya
shaffāf samundar hoñ use chuum rahā huuñ

sūraj pe vaqt kā jo gahan lag gayā 'hanīf'
dekhā to mujh se saaya mirā nā-shanās thā

jaane kaun aa ke palaT jaatā hai darvāze se
ek saaya sā maiñ dahlīz par aksar dekhūñ

maiñ huuñ talāsh-e-rāh-e-mohabbat hai dasht hai
saaya nahīñ nishān nahīñ ham-safar nahīñ

chār-sū hai baḌī vahshat kā samāñ
kisī aaseb kā saaya hai yahāñ

khīñchtī hai aql jab koī hisār
dhuup kahtī hai ki ye saaya bhī kyā

sanobar kī ghanī shāḳhoñ kā vo kaif-āfrīñ saaya
ki jis meñ iztirāb-e-zindagī ne bhī sukūñ paayā

ik āvāra bādal se kyuuñ maiñ ne saaya māñgā thā
merī bhī ye nādānī thī us kī bhī thī majbūrī

is tarah kī zid hai use har baat meñ mujh se
kahtā huuñ maiñ saaya to vo kahtā hai nahīñ dhuup

hai zer-e-zamīñ saaya to bālā-e-zamīñ dhuup
duniyā bhī do-rañgī hai kahīñ chhāñv kahīñ dhuup

mujhe bahut tez dhuup darkār hai mohabbat ke is safar meñ
kabhī kahīñ sar pe saaya karne koī ghanerā shajar na aa.e

apnā saaya to maiñ dariyā meñ bahā aayā thā
kaun phir bhaag rahā hai mire pīchhe pīchhe

kaT gayā peḌ to āñgan kā magar
mere sar se kabhī saaya na gayā

ik umr dhuup meñ jo palī thī vo kashmakash
saaya ghane daraḳht kā dekhā to Dar ga.ī

dhuup javānī kā yārāna apnī jagah
thak jaatā hai jism to saaya māñgtā hai

vaqt kī dhuup meñ jaltā hai badan
mujh pe saaya koī āñchal kar de

agar is pe baiTh jaatā koī murġh-e-nā-umīdī
mirā naḳhl-e-ārzū phir kahāñ sāya-dār hotā

qāfila umr kā paiham safar-āmāda sahī
shajar-e-sāya-fagan dekh ke thak jaatā hai

shahr meñ tere kis se gilā phir karte ham
'aḳhtar' jab apnā hī saaya duur huā

saath nibhāne kī Thānī hai to ye bhī sun lo
in rāhoñ meñ saaya bhī barham ho jaatā hai